Son zamanlar sosial mediada populyarlıq qazanan kornivor (ətyeyən) pəhriz stili sürətli arıqlama və sağlamlıq vədləri ilə gündəmə gəlib.
BEY.AZ Türk mediasına istinadla xəbər verir ki, bu pəhrizdə yalnız ət və heyvan mənşəli məhsullar istehlak olunur, meyvə, tərəvəz və digər qidalar isə rasiondan tamamilə çıxarılır. Lakin mütəxəssislər xəbərdarlıq edir ki, uzun müddət bu pəhrizə əməl etmək ciddi sağlamlıq problemlərinə səbəb ola bilər.
Böyrəklərə Yük Düşür
Dietoloq Fatma Turanlı bildirir ki, yüksək protein və yağ tərkibli qidalar böyrək funksiyasına mənfi təsir edə bilər. Xüsusilə böyrək problemləri olan insanlar üçün risk daha yüksəkdir.
Ürək-Damar Xəstəlikləri Riski Artır
Kornivor pəhriz xolesterin və doymuş yağlarla zəngindir, bu da yüksək təzyiq, ürək-damar xəstəlikləri və damar tıxanıqlığı riskini artırır.
Vitamin və Mineral Əskikliyi
Bu pəhrizdə meyvə və tərəvəzlər olmadığı üçün lif, C vitamini, antioksidantlar və digər həyati əhəmiyyətli maddələr çatışmazlığı yaranır. Bu isə immunitet sisteminin zəifləməsinə, həzm problemlərinə və enerjinin azalmasına səbəb ola bilər.
Xərçəng Riski
Uzun müddət yalnız ət əsaslı qidalanmaq kolorektal (yoğun bağırsaq) xərçəngi riskini artırır. Fatma Turanlı vurğulayır ki, az lif istehlakı bu xəstəliyin yaranmasında mühüm amildir.
Mütəxəssislər Nə Tövsiyə Edir?
Dietoloqlar balanslı və müxtəlif pəhrizin daha sağlam seçim olduğunu bildirirlər. Tərəvəz, meyvə, taxıl, qoz-fındıq və müxtəlif protein mənbələri daxil edilməklə, daha balanslı və uzunmüddətli sağlam pəhriz seçmək tövsiyə olunur.
Kornivor pəhriz qısa müddətdə arıqlamağa kömək edə bilər, lakin uzunmüddətli istifadəsi ciddi sağlamlıq riskləri yaradır. Buna görə də, hər hansı bir pəhrizə başlamazdan əvvəl mütləq mütəxəssis məsləhəti almaq vacibdir.
