İtalyan mütəxəssis Andrea Berta 12 illik fəaliyyətindən sonra Madrid “Atletiko”sunun idman direktoru vəzifəsindən ayrılıb.
Arena.az bu barədə “Atletiko”nun rəsmi saytına istinadən məlumat verir.
Klubdan verilmiş bəyanatda, Berta ilə “Atletiko” arasında müqavilənin ləğvi üçün razılıq əldə edildiyi bildirilib.
İtalyan mütəxəssis Andrea Berta “döşəkçilər”in düşərgəsinə 2013-cü ildə “Cenoa”dan keçib. Berta əvvəlcə, “döşəkçilər”in beynəlxalq skautinq şöbəsinə daxil olub, daha sonra klubun texniki direktoru vəzifəsini tutub. 2017-ci ildə Andrea Berta, Xose Luis Peres Kamineronu əvəzləyərək “döşəkçilər”in idman direktoru olub.
Xatırladaq ki, Andrea Bertanın dönəmində “Atletiko” 2013-cü ildə İspaniya Kral Kubokunu, 2013/2014-cü və 2020/2021-ci illər mövsümlərində İspaniya La Liqasını, 2014-cü ildə İspaniya Super Kubokunu qazanıb. Beynəlxalq səviyyədə isə “Atletiko” Bertanın dönəmində 2017/2018-ci illər mövsümündə Avropa Liqasını və 2018-ci ildə UEFA Super Kubokunu qazanıb.
Hazırda, “Atletiko” 18 oyundan 41 xalla İspaniya La Liqasının yarış cədvəlinin 2-ci pilləsində mümkün liderliyə iddialıdır. “Döşəkçilər” 19 oyundan 43 xalla zirvədə yer almış “Real”a nəzərən mümkün liderlik imkanını saxlayırlar.
