1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Məşhur mesajlaşma tətbiqi "WhatsApp" öz istifadəçilərini innovativ həllərlə təəccübləndirməyə davam edir. Bu dəfə tərtibatçılar daxili sənəd skaneri funksiyası ilə sevindiriblər.
Oxu.Az-ın "WABetaInfo"ya istinadla verdiyi məlumata görə, yeniləmə artıq "WhatsApp"ın 24.25.89 versiyasında mövcuddur.
Bildirilib ki, "WhatsApp" istifadəçiləri artıq sənədlərin əvvəlcədən fotosunu çəkməyə və üçüncü proqram vasitəsilə skan etməyə ehtiyac duymayacaqlar. İndi hər şey mesajlaşma tətbiqində birbaşa smartfonun kamerası vasitəsilə edilir. Bu yolla skan edilmiş sənədləri dərhal çata və ya qrupa göndərmək olar.
Bunun üçün çatı, ya qrupu açın və mətn daxiletmə sahəsində yerləşən "+" işarəsinə basın, "Sənəd" ikonasına vurun, "Sənədi skan et" seçimini edin və yaradılmış faylı çata, yaxud qrupa göndərin.
Hazırda sənəd skaneri seçimi yalnız "iOS" cihaz sahiblərinin bir qismi üçün mövcuddur. Tətbiq yeniləndikdən sonra funksiya hamı üçün, həmçinin "Android" əməliyyat sistemli smartfon istifadəçiləri üçün də əlçatan olacaq.
