“Yuventus”un idman direktoru Kristiano Cuntoli “byankoneri”nin əsas qış transfer hədəfləri ilə bağlı məlumat verib.
Arena.az xatırladır ki, “qoca sinyora” PSJ-nin fransalı mərkəz hücumçusu Randal Kolo Muani və “Barselona”nın uruqvaylı mərkəz müdafiəçisi Ronald Arauxo ilə maraqlanır.
“Ronald Arauxo və Randal Kolo Muani iki çox yaxşı oyunçudur. Biz ümidvarıq ki, gələn həftə yeni transferlərlə bağlı yaxşı xəbərlərimiz olacaq”, – nüfuzlu italyan jurnalist-insayder Fabritsio Romano Kristiano Cuntolidən sitat gətirir.
Daha əvvəl mətbuatda, “Barselona”nın Arauxoya görə “Yuventus”un 35 milyon avro məbləğində təklifini rədd etdiyi və buna görə də Turin klubunun 50 milyon avro məbləğində yeni təkliflə Kataloniya klubuna müraciət etdiyi barədə məlumat yayılıb. Kolo Muaniyə gəlincə, “Yuventus” fransalı hücumçunu icarəyə götürmək niyyətindədir.
