"Qarabağ"ın futbolçusu Olavio Juninyo Ağdam klubundan ayrılır.
Modern.az xarici KİV-ə istinadən xəbər verir ki, o, "Flamenqo" ilə müqavilə imzalamaq üçün Braziliyaya yollanıb.
Klubun futbol direktoru Joze Boto məlumatı təsdiq edib. O bildirib ki, 28 yaşlı hücumçunun keçidi ilə bağlı razılıq əldə olunub:
"Juninyo yalnız tibbi müayinədən keçdikdən və müqavilə imzaladıqdan sonra bizim futbolçu olacaq. Bu isə hələ baş verməyib".
Klub rəsmisi qeyd edib ki, Juninyo bu gün Rio-de-Janeyroda olacaq. O, tibbi müayinədən sonra müqavilə imzalayacaq.
Qeyd edək ki, Olavio Juninyo 2023-cü ildən "Qarabağ"ın formasını geyinir. Braziliyalı forvard Azərbaycan çempionatının və kubokunun qalibi olub. Bir müddət əvvəl o, İspaniyanın “Sevilya” klubunun təklifindən imtina edib.
“Qarabağ”ın baş məşqçisi Qurban Qurbanov bir müddət əvvəl Juninyonun klubdan getmək istəməsinə münasibət bildirərkən deyib ki, əsas oyunçuların komandadan getməsi onun işinə mane olur:
“Qarabağ” transfer zamanı futbolçulara az məbləğ ödəmir. Artıq Avropa bazarına çıxmışıq. Bu, yeni və perspektivli bir addımdır. Klubumuza kənardan diqqət daha da çoxalacaq və liqamıza maraq artacaq. Azərbaycan futbolunun transfer bazarında iştirak etməsi həm bizim, həm də ölkə futbolunun inkişafı üçün müsbət məqamdır”.
