“Küveyt, BƏƏ, Səudiyyə Ərəbistanı kimi ölkələrdə kimin maşın aldığının o qədər də əhəmiyyəti yoxdur. Çünki büdcələrində də kifayət qədər pul var, ayrıca pulları da... Amma Azərbaycan kimi hər il az qala 5 milyard Qarabağın inşasına pul ayıran bir ölkədə dövlət qurumlarının tenderlərlə bahalı maşın almalarına ehtiyac yoxdur. Bu yaxınlarda eşitdim ki, dövlət agentliklərindən biri bahalı lüks maşınlar alıb. Düzgün deyil. Azərbaycanda yığılan avtomobillər var. Bir sıra idarələr, müəssisələr bunlardan da istifadə edə bilərlər. Naxçıvan, Neftçalada və digər yerlərdə "Şevrolet Kobalt" kimi maşınlar yığılır. Belə maşınlardan da istifadə etmək lazımdır ki, büdcə çox yüklənməsin”.
Bu sözləri Pravda.az-a açıqlamasında sabiq deputat, Vəhdət Partiyasının sədri Tahir Kərimli deyib.
“Milli Məclisdə vaxtilə məsələ qaldırmışdım ki, protokol qaydasında xarici qonaqları qarşılamaq üçün nəzərdə tutulan maşını dəyişmək lazımdır. Qoy dövlətin adına yaxşı maşın olsun. Söhbət bir maşından gedirdi. Üstümə düşdülər ki, Qarabağda tikinti işləri aparılan vaxt sən bu məsələni qaldırırsan. Sosial mediada da əleyhimə çoxlu yazılar yazdılar. Halbuki dövlətin siması olan bir maşından söhbət gedirdi. Ad çəkmək istəmirəm, həmin qurum sonradan 50-dən çox bahalı maşın aldı. Bəs necə olur, mən bir maşının məsələsini qaldıranda üstümə düşdülər, amma sonradan ən bahalı maşını özləri aldılar?”, - T.Kərimli bildirib.
Qeyd: Son zamanlar bahalı avtomobilləri "İçərişəhər" Dövlət Tarix-Memarlıq Qoruğu İdarəsi, "Dayanıqlı və Operativ Sosial Təminat Agentliyi" publik hüquqi şəxsi, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, "Qida Təhlükəsizliyi İnstitutu" publik hüquqi şəxsi və digər qurumlar alıb.
Aytəkin Qardaşova
