Kot-d’İvuar millisinin və Dortmund “Borussiya”sının mərkəz hücumçusu Sebastyen Haller Almaniya klubundan ayrılıb.
Arena.az xəbər verir ki, 30 yaşlı forvard bundan sonra Niderlandın “Utrext” klubunun formasını geyinəcək.
Haller “Borussiya”nı mövsümün əvvəlində tərk etmişdi. O, icarə əsasında İspaniyanın “Leqanes” klubuna keçmişdi. Lakin bu qış fasiləsində “Leqanes”dən ayrılan futbolçu mövsümün qalan hissəsində “Utrext”də oynamağa qərar verib. Hansı ki, o, 2015-2017-ci ilərdə də bu klubun uğurları üçün çalışıb.
Peşəkar karyerasına “Oser”də başlamış Sebastyen Haller, “Utrext”, “Ayntraxt”, “Vest Hem”, “Ayaks” kimi klublarda çıxış edib. 2022-ci ildən “Borussiya”da forma geyinən hücumçu bu komandada 41 oyuna çıxıb, 12 qol vurub, 6 assistlə yadda qalıb.
Fransanın aşağı yaş qrupları üzrə müxtəlif yığmalarında oynamış Haller 2020-ci ildən Kot-d’İvuar millisində forma geyinir. O, bu komandanın heyətində 27 oyuna 10 qol vurub, 2 məhsuldar ötürmə verib.
“Transfermarkt” internet-portalı 30 yaşlı hücumçunun transfer dəyərini 3 milyon avro məbləğində qiymətləndirir.
