İngiltərənin “Bornmut” klubunun sağ cinah müdafiəçisi Maks Eronz bundan sonra “Valensiya”nın uğurları üçün çalışacaq.
Arena.az bu barədə İspaniya klubunun rəsmi saytına istinadən xəbər verir.
La Liqa təmsilçisi 25 yaşlı ingilis futbolçunu cari mövsümün sonuna kimi satınalma şərti ilə icarəyə götürüb. Tərəflər arasındakı anlaşmanın digər detalları açıqlanmır.
Tam adı Maksimillian Ceyms Eronz olan müdafiəçi “Norviç Siti”nin yetirməsidir. O, “Bornmut”a 2023-cü ilin avqust ayında 8,1 milyon avro müqabilində keçib. Maks Premyer Liqa təmsilçisinin heyətində meydana çıxdığı 27 oyunda 4 məhsuldar ötürmə müəllifi olub.
Maks Eronz İngiltərənin U-19 və U-21 yığmalarında forma geyinsə də, sonradan ona əsas millidə ehtiyac duyulmayıb.
“Transfermarkt” internet-portalı 25 yaşlı müdafiəçinin transfer dəyərini 16 milyon avro məbləğində qiymətləndirir.
