Adlarını şərəfli ölümləri ilə ölümsüzlük tarixinə qızıl hərflərlə yazan şəhidlərimiz xalq olaraq həmişə qəlbimizdə, yaddaşımızdadır. İgid qəhrəmanların əziz xatirəsi istər doğum, istərsə də anım günlərində daim xatırlanmalıdır.
16 yanvar Birinci Qarabağ müharibəsi şəhidi, Azərbaycanın Milli Qəhrəmanı Rövşən Abdullayev anadan olduğu gündür.
O, 1969-cu ildə Lerik rayonunda dünyaya göz açıb.
Orta təhsilini Astara şəhər 1 saylı orta məktəbdə başa vurduqdan sonra ailəsi ilə birlikdə Lənkərana köçüb. Rövşən 1987-ci ildə Sankt-Peterburq Ali Hərbi-Siyasi məktəbinə daxil olub. 1991-ci ildə ali məktəbi əla qiymətlərlə bitirən gənc leytenantın təyinatını Rostov şəhər Daxili İşlər Şöbəsinə veriblər. İgidimiz Azərbaycana qayıdan kimi DİN-in əməkdaşı olaraq daxili qoşunların tərkibinə qatılıb. Gənc zabit bir müddət sonra Zəngilana göndərilib. O, 70 nəfərdən ibarət taqımın komandiri təyin edilib. Rövşənin başçılıq etdiyi taqım göstərdiyi şücaətə görə cəbhədə ad çıxarıb.
Qəhrəmanımızın köməkliyi ilə düşmənin Qafan rayonunda yerləşən obyektləri məhv edilib. 13 sentyabr 1993-cü il onun son döyüşü olub. Erməni faşistləri Zəngilan rayonunun Qazançı kəndinə hücum edib. Rövşən döyüş yoldaşları ilə "QAZ-66" markalı avtomobilə əyləşib Qazançıya yollanıb, onlar kəndin yaxınlığında düşmənin PDM-i və piyadaları ilə üzbəüz çıxıblar, güclü atəşə maruz qalan vətənimizin mərd övladları ölüm-dirim savaşına giriblər.
Rövşən yoldaşlarına meşəyə çəkilməyə əmr edib. Özü isə ağır yaralansa da silahı yerə qoymayıb. Yoldaşları onu xəstəxanaya çatdırsalarda artıq gec idi. Vətənin mərd oğlu şücaətlə vuruşaraq şəhadətə ucalıb.
Qeyd edək ki, şəhidimiz subay idi. Azərbaycan Respublikası Prezidentinin 15 yanvar 1995-ci il tarixli 262 saylı fərmanı ilə Rövşən Əbdülhüseyn oğlu Abdullayev ölümündən sonra "Azərbaycanın Milli Qəhrəmanı" adına layiq görülüb. Lənkəran şəhər qəbiristanlığında dəfn olunub. Lənkəran şəhərində abidəsi və parkı, adına Lerik şəhərində mədəniyyət evi və küçə var.
Allah rəhmət eləsin!
Zərintac MayisqızıMissiya.Az
