Azərbaycan Premyer Liqasında qış fasiləsi başa çatmaq üzrədir.
Çempionatda növbəti – XIX tura sabah start veriləcək. Lider “Qarabağ” azarkeşləri önündə “Şamaxı” ilə üz-üzə gələcək. Digər görüşlər isə 18 və 19 yanvarda olacaq.
Premyer Liqa klublarından yalnız “Turan Tovuz” toplanışı ölkə xaricində keçdi. Türkiyədə yığışan kollektiv burda hazırlıq keçdikdən sonra vətənə qayıdaraq məşqləri burda davam etdirdi. “Turan Tovuz” Türkiyədə keçirdiyi iki sınaq matçından da məğlub ayrıldı. Kurban Berdıyevin yetirmələri Özbəkistanın “Paxtakor” və Rumıniyanın “Buzau” klubuna eyni – 0:2 hesabıyla uduzub.
Digər klublar isə toplanışını Azərbaycanda keçirdi. “Neftçi”dən başqa bütün kollektivlər azı bir sınaq matçında qüvvəsini sınadı. “Ağ-qaralar” toplanışı Qəbələdə keçirdiyi üçün özünə rəqib tapa bilmədi. Futbolçuların oyun keçirmədən başa vurduğu hazırlığın necə təsir edəcəyini çempionatda daha yaxşı görəcəyik. Digər Premyer Liqa təmsilçiləri isə bir-birilərinə qarşı keçirdikləri duellərdə qüvvələrini sınadılar.
Klublar qış fasiləsində transfer dönəmini də sakit keçirir. Bu ana qədər diqqətçəkən transfer məsələsi “Qarabağ”ın hücumçusu Juninyonun Braziliyanın “Flamenqo” klubuna keçməsidir. Digər komandalar isə əvvəlkitək “qara qutu” hesab edilə biləcək legioner transferləri ilə diqqət çəkməkdədir.
Sabah çempionatda II dövrə başlayacaq və hər komanda uğurlu start hədəfləyir. Turun mərkəzi görüşü “Neftçi Arena”da olacaq. Tarixinin uğursuz mövsümünü keçirən “Neftçi” burda “Sabah”ın müqavimətini qırmağa çalışacaq.
Digər maraqla gözlənilən qarşılaşma isə Tovuzda “Kəpəz” və “Turan Tovuz”un duelidir. “Qərb derbisi” adlandırılan matçda nominal meydan sahibi “Kəpəz” olacaq. Gəncə şəhər stadionunun yenilənməsi ilə bağlı doğma arenasından kənarda oynayan “Kəpəz” üçün hər xal qızıla bərabərdir.
Avrokuboklar mübarizəsində bir addım öndə görünən “Araz-Naxçıvan” dövrənin ilk sınağını bu yolda əsas rəqiblərindən olan “Zirə”yə qarşı keçirəcək. Vaqif Cavadovun rəhbərliyi altında uğurlu qrafik cızan “Sumqayıt” isə “Səbail”lə münasibətlərinə aydınlıq gətirəcək.
Şahin Cəfərov
