Daxili İşlər Nazirliyinin Daxili Qoşunlarının zabiti olan Rövşən Əbdülhüseyin oğlu Abdullayev 1969-cu il yanvarın 16-da Lerik rayonunda anadan olub.
QHT.az xəbər verir ki, o, 1987-ci ildə Sankt-Peterburq Ali Hərbi-Siyasi məktəbinə daxil olub. 1991-ci ildə ali məktəbi əla qiymətlərlə bitirən gənc leytenantın təyinatı Rostov şəhər Daxili İşlər Şöbəsinə verilib. O, Azərbaycana qayıdan kimi DİN-in əməkdaşı olaraq daxili qoşunların tərkibinə qatılıb. Gənc zabit bir müddət sonra Zəngilana göndərilib. Rövşən Abdullayev 70 nəfərdən ibarət taqımın komandiri təyin edilib və onun başçılıq etdiyi taqım göstərdiyi şücaətə görə cəbhədə ad çıxarıb. Onun köməkliyi ilə düşmənin Qafan rayonunda yerləşən hərbi obyektləri məhv edilib. Rövşən Abdullayev 13 sentyabr 1993-cü ildə erməni silahlı birləşmələrinin Zəngilan rayonunun Qazançı kəndinə hücumu zamanı baş verən döyüşdə qəhrəmancasına şəhid olub.
Azərbaycan Respublikası Prezidentinin 15 yanvar 1995-ci il tarixli fərmanı ilə Rövşən Əbdülhüseyn oğlu Abdullayev ölümündən sonra "Azərbaycanın Milli Qəhrəmanı" adına layiq görülüb.
Ruhu şad olsun!
