Qış fasiləsində növbəti transferini reallaşdıran “Şamaxı” yarımmüdafiəçi Alfons Msanga Mabulanı heyətinə qatıb.
İdman.biz xəbər verir ki, 21 yaşlı futbolçu Azərbaycana gələr-gəlməz ilkə imza atıb.
Serbiyanın “Spartak” və “Novi Sad” klublarında da oynamış Alfons Premyer Liqanın tarixinə ilk tanzaniyalı kimi düşəcək. Bu Afrika ölkəsi indiyədək çempionatımızın yüksək dəstəsində təmsil olunmayıb.
Ümumiyyətlə, azarkeşlərimiz futbol aləmində ekzotik ölkə sayılan Tanzaniyanı yalnız 2024-cü ilin martında yaxından tanıyıblar. Bu ölkənin millisi Bakıda keçirilən FİFA seriyasında Monqolustan və Bolqarıstanla yoldaşlıq görüşləri keçiriblər. Bundan 10 ay sonra isə Tanzaniyadan oyunçu gətirilib.
“Şamaxı” Premyer Liqa üçün Afrikada yeni məkan kəşf edib. Hərçənd bu qitənin əksər ölkələrinin nümayəndələri çempionatımızda, hətta millimizdə forma geyiniblər.
Nigeriyalı Usim Nduka yığmamıza da cəlb olunub. Məhz elə onun kimilərə görə futboldakı legionerlər barədə dəqiq və əminliklə danışmaq olmur. Axı 2-3, bəzən hətta 4 ölkənin pasportunu daşıyan futbolçular da var. Premyer Liqada oynamış afrikalılar və afrikaəsilliləri hansı ölkənin hesabına yazmağı dəqiq müəyyənləşdirmək mümkünsüzdür. Fransa, Belçika və digər ölkələrin vətəndaşlıqlarını daşıyan afrikalılar buna imkan vermir.
Amma istənilən halda, Tanzaniyanın Azərbaycana futbolçu verən 36-cı Afrika ölkəsi olduğunu söyləmək mümkündür. Bu siyahıda mütləq lider Nigeriyadır. Ndukanın 50-dən çox həmyerlisi çempionatımızda top qovub.
Kamerun, Seneqal, Qana, Syerra-Leone, Qvineya, Fil Dişi Sahilinin Premyer Liqadakı təmsilçi sayı iki rəqəmlə ifadə olunur. Azərbaycanda bombardir olan yeganə afrikalı Yakuba Bamba da Fil Dişi Sahilindəndir.
Bir sıra Afrika ölkələrinin çempionatımızdakı təmsilçi sayı 2-9 aralığında olub. Doqquz futbolçu isə öz ölkəsinin yeganə nümayəndəsidir. Yalnız bir oyunçusu Premyer Liqada olanlar Çad, Benin, Botsvana, Burundi, MAR, Madaqaskar, Malavi, Mavritaniya, Mozambikdir. Tanzaniya da məhz sonunculara qoşulacaq.
Qeyd edək ki, “Şamaxı” Alfonsla 6 ay + 1 illik müqavilə imzalayıb.
Vüqar Xeyrullayev
İdman.biz
