İspaniya Kral Kubokunun 1/8 finalında “Elçe” üzərində 4:0 hesablı səfər qələbəsi Madrid “Atletiko”su üçün əlamətdar olub.
Arena.az məlumat verir ki, bu qələbə sayəsində “Atletiko” şəxsi klub rekodunu daha da yaxşılaşdırıb.
Söhbət ardıcıl qələbələr silsiləsindən gedir ki, “döşəkçilər” bu göstəricini 15 oyuna çatdırıblar.
Argentinalı mütəxəssis Dieqo Simeonenin yetirmələri İspaniya La Liqasında ardıcıl 8 qələbə, həmçinin İspaniya Kral Kubokunda 4 qələbə və Çempionlar Liqasının Liqa mərhələsində 3 qələbə qazanıblar. Bu müddətdə “döşəkçilər” rəqib qapılarına 39 qol vurublar, cəmi 8 qol buraxıblar.
Bundan əvvəl “Atletiko” 2012-ci ilin avqust ayından oktyabr ayına qədər 13 oyundan ibarət ən uzun qələbə silsiləsi nümayiş etdirmişdi. O vaxt da “döşəkçilər”i argentinalı mütəxəssis Dieqo Simeone çalışdırırdı.
Madrid “Atletiko”su 19 oyunda topladığı 44 xalla İspaniya La Liqasının yarış cədvəlinin zirvəsində qərarlaşıb.
