1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
"Fransada yoxsulluğun azalma tempi 20 il bundan əvvəl dayanıb və 2004-cü ildən etibarən artmağa başlayıb. Bu faktı Fransanın İqtisadi Elmlər və Statistikaya dair Milli İnstitutunun 2024-cü ilin iyul ayında dərc etdiyi arayış da təsdiqləyir".
Oxu.Az-ın verdiyi məlumata görə, bu barədə Fransanın nüfuzlu "Le Monde" qəzetində dərc olunan məqalədə deyilir.
Bildirilir ki, kontinental Fransada doqquz milyon insan yoxsulluq şəraitində yaşayır. Bu rəqəm ölkə əhalisinin 14.4 faizini təşkil edir.
"Lakin vəziyyət Fransanın dənizaşırı ərazilərində daha acınacaqlıdır. Burada əhalinin sayı cəmi 2.6 milyon olsa da, 40 faizi yoxsulluq içində yaşayır. Beləliklə, Fransa üzrə yoxsulların sayı 10 milyona çatır", - deyə məqalədə vurğulanıb.
Fransanın "Dövlət İslahatları Dərnəyi" beyin mərkəzinin üzvləri olan Kristian Babüzyo, Bernadet Malqorn və Emmanuel Millardın hazırladıqları məqalədə qeyd edilib ki, ölkədə yoxsulluqla mübarizəyə illik təxminən 51 milyard avro ayrılmasına və yüzminlərlə könüllünün səylərinə baxmayaraq, vəziyyət dəyişmir.
Məqalə müəllifləri mövcud vəziyyətin səbəbini Fransanın yoxsulluğa qarşı apardığı mübarizədə qlobal yanaşma çatışmazlığında görürlər. Onlar yoxsulluqla mübarizə və sosial siyasətin effektivliyini artırmaq üçün dövlət və ictimai qurumların daha təsirli tədbirlər görməsinin zəruri olduğunu vurğulayırlar. Xüsusilə dəstək müavinətləri ilə bağlı öhdəliklərin departamentlərə həvalə edildiyi, lakin dövlətin maliyyə kompensasiyasının 2008-ci ildən bəri, demək olar ki, dəyişmədiyi bildirilir.
