Bakı, 16 yanvar, AZƏRTAC
Prezident İlham Əliyevin 27 dekabr 2024-cü il tarixli Sərəncamı ilə sosial müdafiə sahəsinin inkişafında səmərəli fəaliyyətinə görə “Tərəqqi” və “Dövlət qulluğunda fərqlənməyə görə” medalları ilə təltif edilmiş Əmək və Əhalinin Sosial Müdafiəsi Nazirliyinin 12 əməkdaşına vəsiqə və medallar təqdim olunub.
Əməkdaşlarla görüşdə əmək və əhalinin sosial müdafiəsi naziri Sahil Babayev təltif olunmuş nazirlik əməkdaşları adından göstərilən diqqət və qayğıya görə Prezident İlham Əliyevə minnətdarlığını ifadə edib.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, S.Babayev sosial islahatlar prosesində səmərəli fəaliyyəti ilə fərqlənən əməkdaşların əməyinin dövlət başçısı tərəfindən yüksək dəyərləndirildiyini, 2018-2024-cü illər ərzində ölkə Prezidenti tərəfindən nazirliyin 147 əməkdaşının dövlət təltiflərinə layiq görüldüyünü bildirib.
Nazir əməkdaşları təbrik edərək onlara yeni uğurlar arzu edib.
Görüşdə nazirlik sistemində kadr siyasəti və insan resurslarının idarə edilməsi sahəsində görülən işlərə dair məlumat verilib.
Sonra vəsiqələr və medallar təqdim edilib.
Təltifə layiq görülmüş əməkdaşlar dövlət başçısına onların fəaliyyətinə verdiyi yüksək qiymətə görə minnətdarlıqlarını ifadə edib, göstərilən diqqət və qayğıya, etimada uyğun olaraq bundan sonra da sosial müdafiə sisteminin inkişafı proseslərinə töhfə vermək əzmi ilə səylə çalışacaqlarını vurğulayıblar.