“İnter”in baş məşqçisi, italyan mütəxəssis Simone İnzaqi dekabr ayında İtaliya A Seriyasının ən yaxşı məşqçisi seçilib.
Arena.az bu barədə İtaliya A Seriyasının mətbuat xidmətinə istinadən məlumat verir.
Dekabr ayında Simone İnzaqinin “neradzurri”si mümkün 12 xaldan hamısını toplayıb. Belə ki, “İnter” evdə “Parma”ya (3:1), “Komo”ya (2:0), səfərdə isə “Latsio”ya (6:0) və “Kalyari”yə (3:0) hesabıyla qalib gəlib.
“İnter”i uğurla çalışdıran İnzaqi “neradzurri”nin sükanı arxasına 2021-ci ilin iyununda keçib. İtalyan mütəxəssisin Milan təmsilçisi ilə müqaviləsi 2027-ci ilin iyun ayının sonuna qədər qüvvədədir.
İnzaqinin “İnter”ə rəhbərliyi rəqəmlərin gözü ilə belə mənzərə yaradır: 186 oyun, 123 qələbə, 34 heç-heçə, 29 məğlubiyyət. “Neradzurri”nin top fərqi isə 374:155 nisbətindədir.
İtalyan mütəxəssis “İnter”ə bir dəfə (2023/2024) İtaliya A Seriyasını, 2 dəfə (2021/2022, 2022/2023) İtaliya Kubokunu, 3 dəfə isə (2021/2022, 2022/2023, 2023/2024) İtaliya Super Kubokunu qazandırıb.
Simone İnzaqi daha öncə “Latsio”ya da rəhbərlik edib, bu klubla da 3 titul qazanıb.
Sonda onu da xatırladaq ki, İnzaqi cari mövsümdə ilk dəfə, karyerası ərzində isə 5-ci dəfə A Seriyasında ayın ən yaxşı məşqçisi seçilir. Bu göstərici ilə o, yeni rekordçu olub. 48 yaşlı italyan mütəxəssis daha öncə 2021-ci ilin dekabr, 2023-cü ilin oktyabr, 2024-cü ilin yanvar və aprel aylarının da ən yaxşısı elan edilmuşdi.
2024/2025 mövsümünün əvvəlki aylarında ayın ən yaxşısı seçilmiş məşqçilərin siyahısı isə belədir:
Avqust 2024 – Paolo Vanoli Daversa (“Torino”)
Sentyabr 2024 – Antonio Konti (“Napoli”)
Oktyabr 2024 – Marko Baroni (“Latsio”)
Noyabr 2024 – Can Pyero Qasperini (“Atalanta”)
