Bakıda səfərdə olan Gürcüstanın hökumət başçısı İrakli Kobaxidze Azərbaycanın baş naziri Əli Əsədovla təkbətək görüş keçirib.
Teleqraf.com xəbər verir ki, bu barədə Gürcüstanın hökumət administrasiyasının mətbuat xidmətindən bildirilib.
Görüşdə Ə.Əsədov gürcü həmkarını oktyabrın 26-da keçirilmiş parlament seçkilərində hakim komandanın qələbəsi və yenidən baş nazir vəzifəsinə seçilməsi münasibətilə təbrik edib. O vurğulayıb ki, seçkilərin nəticələri gürcü xalqının iradəsini bir daha nümayiş etdirib.
Tərəflər Gürcüstan-Azərbaycan strateji tərəfdaşlığının əsas istiqamətlərini və İqtisadi Əməkdaşlıq üzrə Hökumətlərarası Komissiyanın iclası çərçivəsində müzakirə olunacaq məsələləri nəzərdən keçiriblər.
Gürcüstan ilə Azərbaycan arasında müxtəlif sahələrdə sıx əməkdaşlığın inkişafının müsbət dinamikası qeyd edilib.
Regionda sülhün və sabitliyin vacibliyi də vurğulanıb. İ.Kobaxidze Gürcüstanın üçtərəfli dialoqa və regional əməkdaşlığın inkişafına kömək etməyə hazır olduğunu təsdiqləyib.
