Rusiya diplomatları Böyük Britaniyada qalmaqalın mərkəzindədir.
Musavat.com “Qardian”a istinadla xəbər verir ki, onlar özlərini ekskursiya iştirakçıları kimi göstərərək parlamentin məhdud ərazisinə daxil olublar. Hadisə Milad bayramından əvvəl, dekabrın 25-də baş verib. Londonda parlament palatasına ekskursiyada iştirak edən bir qrup rusiyalı diplomat əsas qrupdan ayrılaraq Lordlar palatasının qapalı hissəsinə düşüb. Onlar təhlükəsizlik əməkdaşları tərəfindən aşkar edilərək qovulublar.
“Biz şübhələnirik ki, onlar sadəcə olaraq Kreml qarşısında Böyük Britaniya parlamentinə sızdıqları ilə öyünmək istəyirdilər. Vəziyyət ideal deyil, lakin heç bir ziyan dəymədən yaxalanıblar”, - mənbə bildirib.
Hadisə Britaniya nazirlərini və təhlükəsizlik rəsmilərini təşvişə salıb, bundan sonra deputatlara və Lordlar palatasının üzvlərinə rusiyalı diplomatları parlamentə təkbətək də dəvət etməmək tövsiyəsi ilə xəbərdarlıq göndərilib.
Diplomatları ekskursiyaya kimin dəvət etdiyi məlum deyil, lakin onların turistlər üçün standart sxemdən istifadə edə biləcəyi güman edilir. 2022-ci ildən Rusiyanın Ukraynaya müdaxiləsi ilə əlaqədar səfir də daxil olmaqla rus diplomatlarına Böyük Britaniya parlamentinə giriş qadağan edilib. 2023-cü ildə rus diplomatlarının hərəkətinə məhdudiyyətlər sərtləşdirilib.
Buna cavab olaraq, Rusiya Britaniya diplomatlarından məqsəd, vaxt və marşrutu dəqiqləşdirərək 120 kilometrlik zonadan kənara səyahət barədə əvvəlcədən xəbərdarlıq etmələrini tələb edən oxşar tədbirlər tətbiq edib. Rusiya Xarici İşlər Nazirliyi bu tədbirləri Londonun Rusiya xarici agentliklərinin Böyük Britaniyadakı işinə mane olan hərəkətləri ilə izah edib.
Musavat.com
