Azərbaycan Respublikası Minatəmizləmə Agentliyinin (ANAMA) İdarə Heyətinin sədri Vüqar Süleymanov Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Baş katibi Kayrat Sarıbayın başçılıq etdiyi nümayəndə heyəti ilə görüşüb.
ANAMA-dan Herbiand.az-a bildiriblər ki, görüşdə nümayəndə heyətinə ölkəmizdə mövcüd mina probleminin miqyası və bu problemin yaratdığı fəsadlar, eləcə də işğaldan azad olunmuş ərazilərdə icra edilən genişmiqyaslı humanitar minatəmizləmə əməliyyatları barədə məlumat verilib.
Görüş zamanı Azərbaycanın AQEM-də sədrliyi müddətində mina təhlükəsi ilə bağlı beynəlxalq səviyyədə məlumatlandırmanın artırılması, eləcə də Azərbaycanın minatəmizləmə sahəsində təcrübəsinin paylaşılması, təşkilata üzv olan mina problemi ilə üzləşmiş ölkələrlə beynəlxalq həmrəyliyin təşviq edilməsi kimi məsələlər ətrafında fikir mübadiləsi aparılıb.
