Azərbaycan millisinin üzvü Ozan Can Kökçü Finlandiyada növbəti matçına çıxıb.
Fanat.Az xəbər verir ki, onun komandası HİK Finlandiya Liqa Kubokunun qrup mərhələsinin 2-ci turu çərçivəsində “İnter Turku” ilə üz-üzə gəlib.
Helsinki təmsilçisi rəqib meydanında baş tutan bu oyunda çətin qələbəyə sevinib – 2:1.
26 yaşlı yarımmüdafiəçi görüşə start heyətdə başlayıb və fasilədə əvəzlənib. O, komandasının 30-cu dəqiqədə vurduğu ilk qolda məhsuldar ötürmə müəllifi olub.
HİK 2 oyuna topladığı 3 xalla Liqa Kubokunun qrup mərhələsinin yarış cədvəlində 2-ci pillədə qərarlaşıb.
Ozan Can Kökçü Finlandiya klubuna 2024-cü il iyulun 31-də cəlb olunub. O, həmin vaxt HİK ilə 2,5 illik müqaviləyə imza atıb. Millimizin üzvü komandasının heyətində 19 oyun keçirib, 2 məhsuldar ötürmə edib.
