ABŞ-nin yeni seçilmiş Prezidenti Donald Tramp sosial şəbəkədə $TRUMP adlı şəxsi kriptovalyutasının istifadəyə verildiyini elan edib. İlk gündə 200 milyon sikkə istifadəçilər üçün əlçatan olacaq və üç il ərzində ümumi tədarük bir milyarda çatacaq.
Elandan sonra ilk saatlarda $TRUMP memkoinin kapitallaşması üç milyard dollara çatıb və bir saat yarımdan sonra dörd milyardı keçib.
Layihənin internet saytı Trampın üslubunda tərtib edilib və onun 2024-cü ilin yayında sui-qəsd cəhdindən sonra deyilən “Döyüş, döyüş, döyüş” ifadəsini ehtiva edir.
Daha əvvəl kriptovalyutaları fırıldaq adlandıran Tramp seçki kampaniyası zamanı fikrini dəyişib. O, ABŞ-ni “dünyanın kriptovalyuta paytaxtına” çevirəcəyini və bitkoinlərin milli ehtiyatını toplayacağını vəd edib.
Keçən il dekabrın əvvəlində Tramp kriptolobbiçi Paul Atkinsin qlobal maliyyə dünyasında kriptovalyutaların ən nüfuzlu rəqiblərindən biri hesab edilən Qiymətli Kağızlar və Birja Komissiyasının rəhbəri vəzifəsinə namizədliyini irəli sürdüyünü elan edib. Bundan sonra bitkoinin qiyməti ilk dəfə yüz min dolları keçdi.
“AzPolitika.info”
