Hər il olduğu kimi, bu il də 20 yanvar günü gəmilər Bakı buxtasına axın ediblər. Eynən 1990-cı ilin 20 yanvar gecəsində olduğu kimi...
Bizim.Media xatırladır ki, o zaman Sovet hərbi donanmasının iri kontingentinin Bakıya girişini əngəlləmək üçün Azərbaycana məxsus çox sayda gəmi Bakı buxtasında sədd qurmuşdu.
Məhz bunun hesabına o zaman Sovet donanmasının Bakıya girişinin qarşısı alınmışdı. Əks-təqdirdə faciənin miqyası daha böyük ola bilərdi.
35 ildən sonra gəmilərimiz yenə Bakı buxtasına axın edir. Amma bu dəfə fərqli məqsəd üçün. Azadlığımız və müstəqilliyimiz uğurunda şəhid olmuş oğul və qızlarımızın xatirəsinə ehtiram bildirmək üçün gəmilər sahilə yan alıb.
Qeyd edək ki, bu gün saat 12:00-da ölkə ərazisində 20 Yanvar şəhidlərinin xatirəsi bir dəqiqəlik sükutla yad ediləcək.
Surxay Atakişiyev, Bizim.Media
