Bu gün Gürcüstanın Saqareco rayonunun Qaraçöp kəndində (Yor-Muğanlı) 20 Yanvar və 9 Aprel şəhidlərinin xatirəsi ehtiramla yad olunub.
AZƏRTAC xəbər verir ki, Azərbaycanın Gürcüstandakı səfirliyinin məsul əməkdaşları Samir Əbdürəhmanov, Ramiz Hacızadə, Saqareco rayonunun meri Aftandil Qulikaşvili, ictimaiyyət nümayəndələri, 20 Yanvar şəhidi Ələsgər Qayıbovun yaxınları, məktəblilər Qaraçöp kəndindəki “Şəhidlik” memorialı önünə gül dəstələri düzüb, şəhidlərin xatirəsini ehtiramla anaraq onların ruhuna dualar oxuyublar.
Çıxış edənlər Azərbaycan və gürcü xalqlarının müstəqillik uğurundakı mübarizəsindən, sovet imperiya qüvvələrinin xalqlarımızın mübarizə əzmini qırmaq üçün törətdiyi dəhşətli cinayətlərdən, vəhşiliklərdən söz açıblar. Bildirilib ki, imperiya qüvvələri 1989-cu il aprelin 9-da Gürcüstanda və 1990-cı il yanvarın 20-də Azərbaycanda qırğınlar törətsə də, heç nəyə nail ola bilməyiblər. Xalqlarımız şəhidlərin qanı bahasına suverenliyini bərpa edib, müstəqil dövlət qurublar.
Vurğulanıb ki, 20 Yanvar faciəsi zamanı 6 nəfər Gürcüstan azərbaycanlısı şəhid olub. Onlardan biri də Qaraçöp kənd sakini Ələsgər Yusif oğlu Qayıbovdur.
Azərbaycanda daha çox Qaraçöp adı ilə tanınan bu yurd yeri mərdlik və qəhrəmanlığın rəmzidir. Özünəməxsus adət-ənənələri, igid oğulları ilə tanınan bu diyarın qəhrəmanları istər Gürcüstanın, istərsə də Azərbaycanın müstəqilliyi uğrunda canlarını sipər etməyə hər zaman hazır olublar. Onların göstərdiyi şücaət el-obaya daim başucalığı gətirib. Bu gün də həmin igidlər qürur və iftixar hissi ilə anılır, xatirələri ehtiramla yad edilir.
Saqareco rayonunun meri Aftandil Qulikaşvili də bildirib ki, qəhrəman övladlarımızın qanı-canı bahasına qazanılan müstəqillik heç zaman süquta uğramayacaq. Bu gün 20 Yanvar şəhidləri anılarkən, 1989-cu il aprelin 9-da Tbilisidə həlak olanların da əziz xatirəsi unudulmur. Azərbaycan və gürcü xalqları öz qəhrəmanlarını heç zaman unutmayacaqlar, onların əziz xatirəsi daim qəlbimizdə yaşayacaq.
Sonra səfirliyin əməkdaşları şəhidin doğulduğu evdə olub, ailə üzvləri və yaxınları ilə görüşüblər.
Bildirilib ki, 1966-cı il martın 15-də Qaraçöpdə dünyaya göz açan Ələsgər Qayıbov şəhidlik zirvəsinə ucalarkən Azərbaycan İnşaat Mühəndisləri İnstitutunun ikinci kurs tələbəsi olub. 1990-cı il yanvarın 19-dan 20-nə keçən gecə o, xeyli sayda yaralıya köməklik göstərib. O, vətənini sevən, fədakar bir gənc olub və Azərbaycan uğrunda canını fəda edib. Ələsgər Qayıbov, Azərbaycan uğrunda tələbə dostları ilə birlikdə mübarizə aparıb. Həmin gecə Ələsgər Qayıbov yaralıların köməyinə tələsərək dəfələrlə Gənclik metrosu yaxınlığından 5 nömrəli xəstəxanaya gedib-qayıdıb. Axırıncı dəfə isə özü yaralı vəziyyətdə xəstəxanaya çatdırılıb, lakin aldığı güllə yarası onun həyatını xilas etməyə imkan verməyib.
Qeyd olunub ki, ailənin xahişi və Azərbaycan səfirliyinin yaxından iştirakı ilə Bakının N.Nərimanov rayonundakı Ələsgər Qayıbov küçəsində şəhidin xatirə lövhəsi asılıb.
Şəhidin yaxınları və ziyalılar göstərilən diqqət və qayğıya görə minnətdarlıq ediblər.
Səfirlik adından şəhidin ailəsinə ərzaq yardımı göstərilib.
Məlumat üçün qeyd edək ki, “Şəhidlik” memorialı Gürcüstanın müstəqilliyi uğrunda 1989-cu il aprelin 9-da Tbilisidə və Azərbaycanın müstəqilliyi uğrunda 1990-cı il yanvarın 20-də canlarından keçmiş şəhidlərin xatirəsinə ucaldılıb. Abidənin müəllifi əslən Saqarecodan olan Azərbaycanın Əməkdar rəssamı mərhum Zahid Hüseynovdur (Şəmirli). Xatirə kompleksi 1991-ci il yanvarın 20-də açılıb.
Daha sonra Yormuğanlının Keşəli kəndindəki “Parlaq Gələcək” kitab evi və tədbir mərkəzində 20 Yanvar faciəsinin 35-ci ildönümünə həsr olunmuş tədbir keçirilib.
Tədbirdə vətənpərvərlik mövzusunda çıxışlar dinlənilib və şəhidlərin xatirəsi ehtiramla yad edilib.
