20 Yanvar faciəsinin 35-ci ildönümü günüdə Ağstafada şəhidlərimizin xatirəsi qürur və ehtiramla yad edilib
Şəhidlərimizin qanı ilə yazılan və xalqımızın azadlıq mübarizəsinin simvoluna çevirilən 20 Yanvarla bağlı Ağstafa rayon Şəhidlər Xiyabanında keçirilən ümumrayon anım tədbirində RİH başçısı Seymur Orucov, rayonun hüquq-mühafizə orqanlarının rəhbərləri, şəhid ailələrinin üzvləri, müharibə veteranları, məsul şəxslər, ictimaiyyət nümayəndələri iştirak ediblər.Əvvəlcə Seymur Orucov xiyabanın memorial xatirə abidəsi önünə əklil qoyub. Sonra şəhidlərimizin məzarları üstünə tər qərənfillər düzülüb, Vətən övladlarının ruhuna dualar oxunub. Saat 12:00-da 20 Yanvar şəhidlərinin xatirəsi bir dəqiqəlik sükutla yad olunub. Avtomobillərdən və qatarlardan səs siqnalları verilib, hüzn əlaməti olaraq dövlət bayraqları endirilib.
Həmçinin Ağstafa RİH başçısı Seymur Orucov rayonun hüquq-mühafizə orqanlarının rəhbərləri və aidiyyəti üzrə məsul şəxslərlə birgə 20 Yanvar şəhidinin Vurğun qəsəbəsindəki doğma evində ailə üzvlərini ziyarət edib. Şəhidlik zirvəsinə ucalarkən 22 yaşında olan tələbə Habil Əzizovun keçdiyi mənalı ömür yolundan, onun Vətənə və torpağa olan sonsuz sevgisindən söz açılıb. Qeyd olunub ki, artıq şəhidlərimizin ruhu şaddır, çünki onların Vətən uğrunda axıtdığı qan hədər getmədi. Otuz beş il əvvəl başlanan çətin və şərəfli yol, Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsi və antiterror tədbirləri nəticəsində ölkəmizin ərazi bütövlüyü və suverenliyinin tam bərpa olunması ilə tarixi Zəfərlə başa çatdı. Məhz bu səbəbdən xalqımız 20 Yanvar faciəsinin 35-ci ildönümünü xüsusi qürur və iftixar hissi ilə qeyd edir. Şəhidin qardaşı, İlqar Əzizov və digər ailə üzvləri ölkəmizdə şəhid ailələrinin üzvlərinə göstərilən xüsusi diqqət və qayğıya görə Prezident İlham Əliyev və Birinci vitse-prezident Mehriban Əliyevaya dərin minnətdarlıqlarını bildiriblər. Vurğun qəsəbə qəbirstanlığında Habil Əzizovun məzarı üstünə tər qərənfillər düzülüb, xatirəsi dərin ehtiramla anılıb.
