Futbol üzrə Özbəkistan milli komandasının mərkəz müdafiəçisi Abdukodir Xusanov bundan sonra “Mançester Siti”nin uğurları üçün çalışacaq.
Arena.az xəbər verir ki, bu barədə İngiltərə çempionu rəsmi saytı vasitəsilə məlumat yayıb.
Mançester nəhəngi Fransanın “Lans” klubundan transfer etdiyi gənc müdafiəçi üçün 40 milyon avrosundan keçib. 20 yaşlı futbolçu ilə müddəti 2029-cu ilin 30 iyununa qədər nəzərdə tutulmuş müqavilə imzalanıb. O, yeni klubunda 45 nömrəli formanı geyinəcək.
Xatırladaq ki, Abdukodir Xusanov Özbəkistanın “Bunyodkor” klubunun yetirməsidir. O, peşəkar karyerasına Belarusun “Energetik-BQU” klubunda başlayıb. 2023-cü ilin yayında “Lans” 450 min avro müqabilində Xusanovu heytinə qatıb. Özbək müdafiəçi Liqa 1 təmsilçisinin heyətində bütövlükdə 31 oyuna çıxıb, 1 məhsuldar ötürmə müəllifi olub.
Özbəkistanın U-17, U-19, U-20, U-23 və Olimpiya yığmalarında oynamış Xusanov 2023-cü ilin iyun ayında ölkəsinin əsas millisində debüt edib. O, gənc olmasına baxmayaraq, Özbəkistan yığmasının heyətində artıq 18 oyun keçirib.
Xusanov 2023-cü ildə Özbəkistanın U-20 yığmasının heyətində Asiya Kubokunun qalibi olub.
“Transfermarkt” internet-portalı 20 yaşlı müdafiəçinin transfer dəyərini 12 milyon avro məbləğində qiymətləndirir.
