Rusiyada anormal hava şəraiti və yoxa çıxan “qaranlıq qış” bəzən böyük iqtisadi problemlər və narahatlıqlardan xəbər verir.
Hafta.az-ın yazdığına görə, yanvarın ortalarında Baykal gölündə yeni əmələ gələn nazik buz təbəqəsi saatda 35 metrə çatan anomal güclü külək nəticəsində dağılıb. Küləyin gölü tamamilə buzsuz qoyması, donmuş səthdə qış turizmi fəaliyyətlərinin, o cümlədən konkisürmə mövsümünün uğursuzluqla başa çata biləcəyi ilə bağlı narahatlıqları artırıb. Vəziyyət o dərəcədə ciddiləşib ki, insanlar yerli şamanları buzun qayıtması üçün ruhlara dua etməyə çağırıblar.
Baykal gölünün buzlu mənzərəsi dünyanın hər yerindən turistləri cəlb edən ən böyük attraksionlardan biridir. Metan qazı qabarcıqlarının buzda, xüsusən də gölün səthində yaratdığı unikal naxışlar qış aylarında turistlərə valehedici mənzərə təqdim edir. Lakin bu il qış fəslinin gec gəlməsi ilə əlaqədar şaxtanın gecikməsi bölgəyə gələn turistlərin bu təbiət möcüzəsini görüb-görə bilməyəcəyini qeyri-müəyyən edir.
Elm adamları isə bu hadisəni mistik vəziyyət hesab etmirlər. İrkutsk Hidrometeorologiya Mərkəzinin mütəxəssisləri bildirirlər ki, Baykal gölündə buzlaşma həmişə yanvarın sonlarına doğru baş verir. Bildirilir ki, gölün dərinliyi (maksimum 1600 metr) səbəbindən suyun soyuması üçün vaxt lazımdır. Səlahiyyətlilər yanvarın sonuna kimi cənub sahillərinin buzla örtüləcəyini proqnozlaşdırırlar. Bununla belə, mütəxəssislər buzlaşma prosesi başa çatmamış göldə maşın sürməyə cəhd edənlərin böyük riskə getdiyini və bunun keçmişdə faciələrlə nəticələndiyini xatırladırlar.
