"Amerikanın qızıl dövrü indidən başlayır" - Prezident Donald Trump yanvarın 20-də keçirilən inauqurasiya mərasimindəki nitqinin əvvəlində və sonunda belə deyib.
O, ABŞ-nin növbəti 4 il üçün planlarını da açıqlayıb. Trump deyib ki, Birləşmiş Ştatlar öz var-dövlətini artıracaq, ərazisini genişləndirəcək və bayrağını Mars da daxil olmaqla, yeni üfiqlərə asacaq.
O, Meksika Körfəzinin adını dəyişəcəyini, onu Amerika Körfəzi adlandıracağını deyib.
19 yanvar İsrail – Həmas atəşkəsindən danışan Trump bildirib ki, o, Yaxın Şərqdə sülhyaradıcı və birləşdirici olacaq.
Prezident Trump ölkəyə gəlirlərin xaricdən gələcəyini və o, bunun üçün "Xarici Gəlir Xidməti" qurduğunu söyləyib. Hökumətin effektiv işləməsi üçün də yeni şöbə yaradılacaq.
Trump ABŞ-da bütün senzuranı dayandıran sənəd imzalayacağını deyib.
İqtisadi planlara gəlincə, Trump ölkənin yenidən varlanacağını deyib. O deyib ki, inflyasiyanı, xərcləri, qiymətləri azaltmaq üçün administrasiyası dərhal işə başlayacaq.
"Amerika yenidən istehsal edən bir ölkə olacaq" deyən Trump ölkədə neft və qaz üzrə qazma işlərinin sürətlənəcəyini bildirib.
O, "elektrikli avtomobil mandatını" ləğv edəcəyini və Amerikada "görünməmiş sürətlə" avtomobillər inşa ediləcəyini söyləyib.
Onun sözlərinə görə, bu gündən ABŞ hökumətində yalnız kişi və qadın olmaqla, iki cinsin olması siyasəti olacaq, "dəri rənginə baxmadan ləyaqət qiymətləndiriləcək".
Trump kartelləri "xarici terror təşkilatı" elan edəcək. Həmçinin ABŞ-Meksika sərhədində fövqəladə hal elan ediləcək - sərhədə daha çox ordu və texnika göndəriləcək.
Bütün bunlarla yanaşı, Trump "20 yanvar qurtuluş günüdür" deyib.
