"Bu, həm klubumuz, həm də Azərbaycan futbolu üçün ağır itkidir".
Teleqraf.com-un məlumatına görə, bunu "Qarabağ"ın baş məşqçisi Qurban Qurbanov klubun fəxri prezidenti Abdulbari Gözəlin dünyasını dəyişməsi barədə danışarkən deyib.
"Gözəl bəyin klub, şəxsən özüm və bütövlükdə Azərbaycan futbolu üzərində böyük haqqı var. Çünki elə bir insan idi ki, hər bir addımı düşünərək, ürəkdən və sevərək atırdı", - deyən 53 yaşlı mütəxəssis bildirib ki, bu, mərhum iş adamının ən üstün tərəfi idi.
"Belə bir insanın bizi tərk etməsi hər birimiz üçün böyük itkidir. Klubda xeyli üzgünlük var. Çalışırıq ki, futbolçularımızı oyuna tam hazırlayaq. Lakin nə qədər etsək də, onu unuda bilməyəcəyik. Allah rəhmət eləsin", Qurbanov əlavə edib.
Qeyd edək ki, Abdulbari Gözəl yanvarın 18-də vəfat edib.
