Azərbaycan çempionu “Qarabağ” bu gün Avropa Liqasının 2024/2025 mövsümünün Liqa mərhələsində 7-ci oyununa çıxacaq.
Arena.az xəbər verir ki, Ağdam klubu doğma meydanda “Styaua” ilə üz-üzə gələcək.
Rumıniya təmsilçisi ilə qarşılaşma Tofiq Bəhramov adına Respublika stadionunda baş tutacaq. Qarşılaşmanı Slovakiyadan olan hakimlər briqadası idarə edəcək.
Azərbaycan çempionu Avroliqanın Liqa mərhələsinə uğursuz start verib. Səfərdə “Tottenhem”ə (İngiltərə) 0:3, “Elfsborq”a (İsveç) 0:1 hesabıyla uduzmuş komandamız evdə də “Malmö”yə (İsveç) 1:2, “Ayaks”a (Niderland) 0:3, Lion “Olimpik”inə (Fransa) 1:4 hesablarıyla məğlub olub. Qurban Qurbanovun kollektivi yalnız səfərdə “Bodo Qlimt”ə (Norveç) 2:1 hesabıyla qalib gəlib. Bu nəticələrdən sonra təmsilçimiz 3 xalla 33-cü pillədə qərarlaşıb.
“Styaua” isə Liqa mərhələsində keçirdiyi ilk 6 oyunda 3 qələbə qazanıb, 2 heç-heçə edib və cəmi 1 məğlubiyyət görüb. Bu komanda hazırda 11 xalla 10-cu pillədədir.
Bu, iki rəqib arasında ilk avrokubok dueli olacaq. Amma Bakıdakı görüş Azərbaycan və Rumıniya komandaları arasında 9-cu avrokubok qarşılaşması olacaq. Bunadək iki ölkə təmsilçilərinin yolları 4 dəfə ikimatçlıq dueldə kəsişib. Bütün qarşıdurmalarda mərhələni rumıniyalılar keçiblər. Baş tutan 8 oyunda Azərbaycan komandalarının yalnız bir qələbəsi var. Buna “Vasluy”u Bakıda məğlub etmiş “Neftçi” imza atıb. Yeganə heç-heçə isə “Astra” ilə qolsuz bərabərə qalan “Zirə”yə məxsusdur. Bakı klublarının ikisi də səfərdə 2 top fərqi ilə uduzub. Sonradan “Bakı” adlanan “Dinamo” da, “Səbail” də Rumıniya klublarına hər iki qarşılaşmada məğlub olub. Ümumilikdə 8 qol vuran təmsilçilərimiz 19 top buraxıblar.
“Qarabağ” isə ilk dəfə Rumıniyadan olan rəqiblə üz-üzə gələcək. Ölkəmizin ən titullu klubu digər təmsilçilərimizdən fərqlənmək, dueldən üstün ayrılmağa çalışacaq. Amma rəqib də öz ölkəsinin ən güclüsüdür. “Styaua” da ilk dəfə Azərbaycan komandası ilə qarşılaşacaq.
Avropa Liqası
Liqa mərhələsi, 7-ci tur
23 yanvar
“Qarabağ” – “Styaua”
Hakimlər: Filip Qlova, Daniel Polaçek, Peter Bednar, Lukaş Dzivyak (Hamısı Slovakiya)
VAR: Mixal Oçenaş (Slovakiya)
AVAR: Martin Dohal (Slovakiya)
Hakim-inspektor: Martin Hansson (İsveç).
UEFA nümayəndəsi: Natalya Vorobyova (Belarus).
Bakı. Tofiq Bəhramov adına Respublika stadionu. 21:45.
