23 yanvar iki şəhidimizin doğum günüdür.
Missiya.Az onları təqdim edir:
Azərbaycanın Milli Qəhrəmanı, Mart hadisələri şəhidi Yalçın Canhəsən oğlu Nəsirov - 23 yanvar, 1976-cı ildə Astara rayonunun Sərək kəndində anadan olub. 1982–1992-ci illərdə burada təhsil alıb. 1994-cü il 19 aprel Milli Orduya çağırılıb. Tərtər və Şamaxı rayonlarında qulluq edən Yalçın verilən həmişə tapşırıqları layiqincə yerinə yetirib. 1995-ci il mart hadisələri baş verib. 13-17 mart günlərində dövlət çevirilişinə cəhd edən dəstənin zərərsizləşdirilməsi zamanı Yalçın ağır yaralanıb. Xeyli qan itirib. 24 mart tarixdə o, aldığı yaradan Sabunçu rayon xəstəxanasında gözlərini əbədi yumaraq şəhadətə ucalıb.
Azərbaycanın Milli Qəhrəmanı, Birinci Qarabağ müharibəsi şəhidi Hikmət Muradov - 23 yanvar 1969-cu ildə Bakı şəhərində dünyaya göz açıb. 1976–1986-cı illərdə 190 saylı orta məktəbdə təhsil alıb. Həmin il Krasnokustk Mülki Aviasiya Məktəbinə daxil olub. 1991-ci ildə buranı fərqlənmə diplomu ilə bitirib. Daha sonra Hikmət Yevlax hava yollarında ikinci pilot kimi fəaliyyətə başlayıb.
Döyüşlərdə iştirakı Hikmət AN-2 təyyarəsi ilə dəfələrlə müharibə gedən əraziyə uçuşlar edib. O, döyüşçülərimizə ərzaq, silah-sursat daşınmasında misilsiz işlər görüb. Cəsur pilot əfsanəvi uçuşlarla hamını heyran qoyurdu…
1991-ci il 29 oktyabr Xocalı rayonunun Xanabad kəndi ərazisində onun idarə etdiyi AN-2 təyyarəsi ermənilər tərəfindən güclü raket atəşinə məruz qalıb, Hikmət heyətlə həlak olaraq şəhidlik zirvəsinə yüksəlib.
Allah hər iki igidimizə rəhmət eləsin!
Zərintac MayisqızıMissiya.Az
