“İnter”in baş məşqçisi Simone İnzaqi UEFA Çempionlar Liqasının Liqa mərhələsinin 7-ci turunun “Sparta” ilə səfər oyununu şərh edib.
Arena.az məlumat verir ki, “neradzurri” səfərdən 1:0 hesablı çətin qələbə ilə qayıdıb.
Simone İnzaqi matçdan sonra baş tutan mətbuat konfransında bunları dilə gətirib:
“Mən oğlanlarımı təbrik etdim. Biz fiziki cəhətdən güclü komandaya qarşı yaxşı oynadıq, standart vəziyyətlər zamanı yaxşı müdafiə olunduq və diqqətimizi itirmədik. İndi son addımımızı atmaq qalır, hər şey öz əlimizdədir. Yeddi oyundan sonra 16 xalımız var, çox güclü rəqiblərə qarşı oynasaq da, cəmi bir qol buraxmışıq”, – UEFA-nın rəsmi saytı italyan mütəxəssisdən sitat gətirir.
Cari mövsümdə keçirdiyi 7 oyunda 16 xal toplamış “İnter” UEFA Çempionlar Liqasının Liqa mərhələsinin yarış cədvəlində 4-cü pillədə qərarlaşıb. İtaliya nəhəngi yarışın ələmə – 1/8 final mərhələsinə birbaşa vəsiqəni hədəfləyib.
Praqa “Sparta”sı isə 4 xalla 29-cu pillədədir. Çexiya təmsilçisi üçün UEFA Çempionlar Liqasının cari mövsümündə mübarizə iddiası artıq başa çatıb.
