“Real”ın braziliyalı ulduzu Vinisius Junior adı ətrafında şayiələr mənzərəsində Madrid klubundakı gələcəyi ilə bağlı sualı cavablayıb.
Arena.az xatırladır ki, braziliyalı hücumçunun yüksək səviyyəli çıxışı mənzərəsində “Vini”nin rekord məbləğdə ödəniş müqabilində Səudiyyə Ərəbistanı klublarından birinə mümkün keçidi haqda şayiələr səngimir.
“Mənim gələcəyim? Madrid “Real”ı!” Mən, sevdiyim klubla 101 qol vurmağı bacardığım üçün şadam. Mən bura uşaq vaxtı gəlmişəm və bu klubun tarixinə düşmək fürsəti məni dünyanın ən xoşbəxt insanı edir.
Bu rəqəmə çatmaqda mənə kömək etdikləri üçün bütün komanda yoldaşlarıma təşəkkür edirəm. Yaşasın Madrid! (ispanca əsli: Hala Madrid! Müvafiq nida “Real” azarkeşlərinin ənənəvi tərənnümüdür – redaktorun qeydi)” – nüfuzlu italyan jurnalist-insayder Fabritsio Romano “Vini”dən sitat gətirir.
Xatırladaq ki, Vinisius Çempionlar Liqasını Liqa mərhələsinin 7-ci turu çərçivəsində Madriddə “Zalsburq”la oyunda “qaymaqlılar”ın 5:1 hesablı darmadağınına, vurduğu dübarə qolla öz töhfəsini verib. Bu qollar Vini”nin “Real”ın heyətində müvafiq 100-cü və 101-ci qolları olub.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib.
Vinisiusun İspaniya nəhəngi ilə müqaviləsinin müddəti 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 26 oyuna çıxıb, 16 qol və 10 məhsuldar ötürmə ilə fərqlənib.
Vinisiusun “Real”da çıxışının ümumi mənzərəsi 291 oyun, 101 qol, 84 məhsuldar ötürmədən ibarətdir.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023), FIFA Qitələrarası Kubokun (2024) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 37 oyun keçirib, 5 qol vurub və 5 məhsuldar ötürmə verib. Vinisius Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” 24 yaşlı braziliyalı vingerin transfer dəyərini 200 milyon avro məbləğində qiymətləndirir.
