“Barselona” Uruqvay millisinin də üzvü olan 25 yaşlı mərkəz müdafiəçisi Ronald Arauxo ilə müqaviləsinin müddətini uzadıb.
Arena.az bu barədə Kataloniya nəhənginin rəsmi saytına istinadən məlumat verir.
Yenilənmiş müqavilə 2031-ci ilin iyun ayının sonuna qədər qüvvədə olacaq.
Daha əvvəl mətbuatda, Arauxonun İtaliya nəhəngi “Yuventus”a keçməyə yaxın olduğu bildirilirdi. Lakin yenilənmiş müqavilə ilə transfer dedi-qodularına da son qoyulub. Uruqvaylı müdafiəçinin “Barselona” ilə əvvəlki müqaviləsinin müddəti 2026-cı ilin yayına qədər nəzərdə tutulmuşdu.
Ronald Arauxo “Barselona”ya 2018-ci ilin avqustunda 4,7 milyon avro məbləğ müqabilində “Boston River”dən (Uruqvay) keçib. Bir müddət Kataloniya klubunun “B” komandasında çıxış etmiş uruqvaylı müdafiəçi 2020-ci ilin oktyabrında “Barselona”nın əsas heyətinə keçirilib. Arauxo klub layihəsinin əsas fiqurlarından biri hesab edilir.
Arauxo cari mövsümün birinci dövrəsinin böyük hissəsini zədə səbəbi ilə kənardan izləməli olub. Sağalıb bərpa olaraq heyətə qayıtmış uruqvaylı müdafiəçi “blauqrana” üçün bütün yarışlarda məhsuldar fəaliyyəti ilə diqqət çəkmədiyi 5 oyun keçirib.
Arauxonun “Barselona”nın heyətində çıxışının ümumi mənzərəsi isə 155 oyun, 8 qol və 6 məhsuldar ötürmədən ibarətdir.
Ronald “Barselona” ilə İspaniya La Liqasının (2022/2023), İspaniya Kral Kubokunun (2020/2021), İspanya Super Kubokunun (2022/2023, 2024/2025) qalibi olub.
Ronald Arauxo 2020-ci ilin oktyabrında debüt etdiyi Uruqvay yığmasının heyətində 20 oyuna 1 qol, 3 məhsuldar ötürmə ilə fərqlənib.
“Transfermarkt” internet-portalı 25 yaşlı uruqvaylı mərkəz müdafiəçisinin transfer dəyərini 55 milyon avro məbləğində qiymətləndirir.
