Bakı, TurkicWorld
Hollandiya Dini Fondunun (HDV) təşəbbüsü ilə yaradılmış və islamşünaslıq, sosial tədqiqatlar, eləcə də təhsil proqramları sahələrində fəaliyyət göstərəcək HDV Akademiyası Haaqada fəaliyyətə başlayıb.
TurkicWorld xəbər verir ki , açılış mərasimi HDV Akademiyasının Haaqadakı binasında keçirilib.
Açılışda Türkiyənin Haaqadakı səfiri Selçuk Ünal, Haaqa səfirliyinin müşaviri Pınar Gülün, Dini xidmətlər üzrə müşaviri Dr. Ömər Özgül, Hollandiyalı alimlər və müxtəlif qurumların nümayəndələri iştirak ediblər.
Proqram Amsterdam Hacı Bayram Vəli məscidinin imamı Tolqa Yasin Çetinkayanın Quran tilavəti ilə başlayıb.
HDV Akademiyasının direktoru Zehra Ünver Vluq, yeni qurumun universitet ilə cəmiyyət arasında körpü rolunu oynayacağına inandığını bildirib.
Türkiyənin Haaqadakı səfiri Selçuk Ünal, Avropada artan İslamofobiyaya diqqət çəkərək, ümid etdiyini bildirib ki, liberal dəyərləri ilə tanınan Hollandiyada anti-müsəlman meyllər güclənməyəcək.
Açılış mərasimində Maurits Berger tərəfindən mühazirə oxunub, ardından “Hollandiya müsəlmanları rəqəmsal dövrdə” adlı xüsusi sessiya təşkil edilib.
