Azərbaycanın regionlarında yaşayan insanların əkin sahələri ilə bağlı problemləri var.
“Report” xəbər verir ki, bunu Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov bu gün rəhbərlik etdiyi komitənin iclasında bildirib.
“Rayonlarda yaşayan insanların ciddi, həll olunmaya biləcək problemləri yoxdur. Bu problemlərdən bəziləri qanunvericiliklə bağlıdır və onların həlli üçün müvafiq addımlar atılmalıdır. Mən bu məsələni bir dəfə də qeyd etmişdim. Bir problem əkin sahələri ilə bağlıdır. Düşünürəm ki, bu məsələni müvafiq tədqiqat mərkəzlərinə yönləndirək və onların cavablarına əsasən qanunvericilikdə dəyişikliklər edək. Lazım gələrsə, müvafiq qurumlara müraciət edək və tövsiyələrimizi təqdim edək”, - o vurğulayıb.
“Biz əsasən şəxsi mülkiyyətlə bağlı məsələlərə diqqət yetiririk. Şəxsi mülkiyyət kənd təsərrüfatı ilə sıx bağlıdır. Məsələn, kimsə gilas bağı salmaq istəyir. Amma bu bağ xeyir vermədikdən sonra onun əvəzinə başqa bağ salmaq istədikdə müəyyən hüquqi maneələrlə qarşılaşır. O həmin gilas ağaclarını kəsib yerinə başqasını əkmək istəsə cərimələnəcək. Amma bu məsələlər xüsusi mülkiyyət hüququ çərçivəsində həll edilməlidir”, - deputat əlavə edib.
