İtaliyanın “Breşiya” klubundan azad agent kimi ayrılmış yarımmüdafiəçi Trent Buhaqyar bundan sonra “Kəpəz”in formasını geyinəcək.
Arena.az bu barədə Gəncə klubunun mətbuat xidmətinə istinadən xəbər verir.
Belə ki, “Kəpəz” bu gün heyətini yeni futbolçu ilə gücləndirib. Ampluaca yarımmüdafiəçi olan Trent Buhaqyarla 6 ay + 1 il müddətinə müqavilə imzalanıb.
Əslən Avstraliyadan olan Buhaqyar Malta yığmasının üzvüdür. Trent tarixi vətənində “Mariners” və “Sidney” klublarının heyətində çıxış edib. 26 yaşlı futbolçunun son klubu İtaliya B Seriyasında çıxış edən “Breşiya” olub. O, 2024-cü ilin iyul ayında keçdiyi bu komandanın heyətində cəmi 2 oyuna çıxıb və fərqlənə bilməyib. Buhaqyar yanvarın 21-də “Breşiya” ilə müqaviləsinə qarşılıqlı razılıq əsasında xitam vermişdi. Bu üzdən də o, “Kəpəz”ə azad agent kimi keçib. Futbolçu cari mövsümün qalan hissəsində özünü yaxşı tərəfdən göstərə bilsə, gələn mövsümdə də Gəncə klubunun formasını geyinəcək.
Trent Buhaqyar vaxtilə Avstraliyanın U-23 yığmasının formasını geyinsə də, 2024-cü ilin oktyabr ayında Malta millisində debüt edib. O, Malta yığmasında 3 oyun keçirib, fərqlənə bilməyib.
Xatırladaq ki, “Kəpəz” bu qış fasiləsində Rati Ardazişvili (“Samtrediya”, Gürcüstan) və Şervoni Mabatşoevi (“İstiklol”, Tacikistan) də heyətinə qatmışdı. Orxan Əliyev (“Turan Tovuz”) və Mahir Həsənov (“Difai”, icarə) isə Gəncə təmsilçisini tərk ediblər.
