"Bloomberg" jurnalisti və insayder Mark Qurmanın məlumatına görə, 2025-ci ildə "Apple" "HomePod"a bənzər, lakin ekranla təchiz olunmuş ağıllı ev cihazını təqdim edəcək.
Valyuta.az xəbər verir ki, onun sözlərinə görə, bu cihaz "Apple" şirkətinin "bu ilin ən əhəmiyyətli buraxılışı" olacaq. Çünki bu, şirkətin ağıllı ev ekosisteminə daxil olmaq istiqamətində ilk ciddi addımıdır.
Cihaz 7 düymlük ekrana malik kiçik divar və ya stolüstü "iPad"a bənzəyəcək. Bu ekran istifadəçilərə texnologiyaya nəzarət etməyə, "FaceTime" vasitəsilə ünsiyyət qurmağa və digər vəzifələri yerinə yetirməyə imkan verəcək. Bundan əlavə, cihaz "Apple A18" prosessoru, "Apple Intelligence" dəstəyi, yüksək keyfiyyətli dinamiklər və "Face ID" funksiyalı kamera ilə təchiz ediləcək.
Bu cür "HomePod"un rəsmi təqdimatının mart-aprel aylarında "iPhone SE" və yeni "iPad" ilə birlikdə baş tutacağı gözlənilir. Lakin cihaz yalnız ilin ikinci yarısında satışa çıxarılacaq. Gələcəkdə "Apple" şirkətinin robotik qola sahib daha bahalı bir versiyanı təqdim etməsi də planlaşdırılır.
"Apple" hər il bir neçə tədbir təşkil edir və ilk tədbirin yaz aylarında keçirilməsi gözlənilir. Daha əvvəl "9to5Mac" nəşrinin jurnalistləri "Apple" şirkətinin yaxın aylarda təqdim edəcəyi məhsulların siyahısını açıqlayıblar.
Həmçinin, "iPhone 17"nin elanına 8 ay qalmış yayılan şayiələrə görə, 2025-ci ilin "iPhone" modelləri son illərin ən maraqlı seriyası olacaq. Bu modellərdə, xüsusilə ön kameralar yenilənəcək və əsas modellər nəhayət 120 Hz ekranlarla təchiz ediləcək. 2025-ci ilin "iPhone" seriyasını gözləmək üçün başqa bir səbəb də "iPhone Air" adlı sirli modelin çıxmasıdır.
Paşa Məmmədli
