“Mançester Siti”nin ispan baş məşqçisi Xosep Qvardiolanın 30 illik həyat yoldaşı Kristina Serra ilə boşanmasının səbəbi məlum olub.
Arena.az xəbər verir ki, bu barədə ispan şou-biznesində etibarlı mənbə hesab edilən qadın jurnalistlər – Lorena Vaskes və Laura Fa məlumat veriblər:
“Kristina Serranın onların münasibətlərinə nöqtə qoymasının səbəbi, Qvardiolanın “Mançester Siti” ilə yeni müqaviləsi idi. Kristina, Mançesteri 2019-cu ildə tərk etmiş və iş maraqlarına diqqət yetirmək üçün Barselonaya dönmüşdü, ancaq mütəmadi olaraq Xosepi ziyarət etməyə çalışırdı.
Ərinin 2027-ci ilin yayına qədər müddətə “şəhərlilər”lə yeni bir razılaşma imzaladığını bildikdən sonra, o, bu münasibətlərə xitam verməyi qərara aldı. Kristina ümid edib ki, Qvardiola, köhnə müqaviləsinin müddəti bitdikdən sonra bu mövsüm Mançesteri tərk edəcək. Onda Xosep, ardıcıl dörd məğlubiyyətdən sonra klubu tərk edə bilməyəcəyini bildirmişdi”, – jurnalist qadınlar bildiriblər.
“Pep”in boşanması haqda oxşar məlumatı, həmçinin Qvardiolanın adı açıqlanmayan dostu paylaşıb:
“Mən düşünürəm ki, onlar bir-birindən uzaqlaşıblar. Xanımı Mançesterden beş ilə yaxın müddət öncə çıxıb-gedib, Barselonaya qayıtmaq üçün. Bu, xanıma təsirini göstərib. O (Qvardiola), əsl əməkçidir, həmçinin ailə işbirliyi üzərində birgə çalışmağın yoxluğu onların münasibətində əksini tapa bilərdi”, deyə “Pep”in adı açıqlanmayan dostu öz mülahizəsini irəli sürüb.
Qvardiola “Mançester Siti”ni 2016-cı ilin iyul ayından çalışdırır. İspan mütəxəssisin İngiltərə klbubu ilə müqaviləsinin müddəti 2027-ci ilin iyun ayının sonuna qədər qüvvədədir.
“Şəhərlilər” bu müddətdə “Pep”in rəhbərliyi altında 506 oyun keçiriblər, 366 qələbə qazanıblar, 64 heç-heçə ediblər, 76 məğlubiyyətə üzülüblər. Top fərqi isə 1277:472 nisbətindədir.
Bu müddətdə “Pep” “Mançester Siti”nin futbol tarixinin ən şanlı salnaməsini yaradıb. Qvardiola “şəhərlilər”ə 6 dəfə İngiltərə Premyer Liqasını, 2 dəfə İngiltərə Kubokunu, 4 dəfə İngiltərə Liqa Kubokunu, 3 dəfə İngiltərə Super Kubokunu, UEFA Çempionlar Liqasını, UEFA Super Kubokunu və FIFA Klub Dünya Kubokunu qazandırıb.
Qvardiola “Mançester Siti”dən öncə “Barselona” və “Bayern”i də uğurla çalışdıraraq, çoxlu qənimətlər qazandırıb.
23 turdan sonra Qvardiolanın “Mançester Siti”si 41 xalla İngiltərə Premyer Liqasının yarış cədvəlində 4-cü pillədə qərarlaşıb.
