Türkiyədə 1990-cı illərdə JİTEM əməkdaşlarının saxladığı şəxslərin itkin düşməsi və ya öldürülməsi ilə bağlı işlərdən daha birinə iddia müddətinin keçməsi səbəbindən xitam verilib.
“Far.Az” xəbər verir ki, bu barədə “BirGün” qəzeti bildirib.
Qeyd olunub ki, Ankarada 1990-cı illərdə JİTEM – türk kəşfiyyat bölməsinin üzvləri tərəfindən törədildiyi güman edilən qətl və itkindüşmə hadisələri ilə bağlı “JİTEM əsas işi”nə xitam verilib. Məhkəmə cinayətlərin törədilməsindən 30 il keçdiyinə görə işin bağlanmasına qərar verib.
İş jurnalist və yazıçı Musa Anterin qətli, həmçinin 1992-ci ildə öldürülmüş Ayten Öztürk də daxil olmaqla digər zərərçəkmişlərlə bağlı idi.
Xatırladaq ki, JİTEM işi üzrə istintaq 1999-cu ildə başlanmış, bu zaman iki ittiham aktı hazırlanmışdı: biri 11 təqsirləndirilən şəxs, digəri isə 5 nəfər üçün. Bu işlər 2010-cu ildə “JİTEM əsas işi” adı altında birləşdirilmişdi. İstintaqın əsas məqamlarından biri 1992-ci ildə jurnalist Musa Anterin qətli idi, bu zaman JİTEM-in keçmiş üzvü Abdulkadir Ayqan mümkün qatillərdən biri kimi Hamit Yıldırımı göstərmişdi. 2012-ci ildə Yıldırım həbs edilmiş, bu da məhkəmə araşdırmasının uzadılmasına imkan vermişdi. Lakin vəkillərin səylərinə və bir neçə məhkəmə iclasına baxmayaraq, sonda bu işlərə baxılması üçün iddia müddəti keçmiş oldu.
Qeyd edək ki, JİTEM (Jandarm Kəşfiyyat və Terrorçuluqla Mübarizə) 1980-ci illərdə PKK terror təşkilatına qarşı mübarizə aparmaq üçün yaradılmış jandarm bölməsi olub. Qrup kəşfiyyat və etirazların yatırılması ilə məşğul olur və tez-tez insan hüquqlarının pozulmasında, o cümlədən insan oğurluğu, işgəncə və qətllərdə ittiham olunurdu. Təşkilatın 1990-cı illərdə ləğv edildiyi güman edilir.
