“Əl-Nəsr”in seneqallı cinah hücumçusu Sadio Mane bir müddət əvvəl, brilyant saat və “Ferrari” haqda səsləndirdiyi fikri şərh edib.
Arena.az xatırladır ki, 2022-ci ildə Qətərdə keçirilmiş dünya çempionatı ərəfəsində Mane “mənim, 10 “Ferrari”, 20 brilyant saat və iki təyyarə nəyimə gərəkdir? Bütün bunlar mənim üçün və bu dünya üçün nə edirlər ki?”, deyə bildirmişdi.
Mane bu fikrinə belə açıqlama verib:
“Bax, elə, belə şeylər barədə düşündüyüm də budur. Əlbəttə, insanlar həyata fərqli baxışlardan baxa bilərlər, mən kimisə qınamıram və ya pulları ilə nə edəcəklərini məsləhət görmürəm. Mən sadəcə bir fikir bildirmişəm. İnsanlar onu fərqli, yaxşı və ya pis qəbul edə bilərlər. Ancaq mənim üçün bu, həyatı necə görmək məsələsidir. Bu, mənim həyat məfkurəmdir”, deyə Mane vurğulayıb.
Əlavə edək ki, Sadio Mane müsəlmandır.
Sadio Mane 2023-cü ilin avqust ayında “Bayern”lə əməkaşlığına xitam verərək, 30 milyon avro məbləğ müqabilində Səudiyyə Ərəbistanının “Əl-Nəsr” klubuna keçib. Manenin “Əl-Nəsr”lə müaviləsinin müddəti 2026-cı ilin iyun ayının sonuna qədər qüvvədədir.
Cari mövsümdə Mane “Əl-Nəsr”in heyətində 27 oyuna çıxıb, 7 qol vurub, 7 məhsuldar ötürmə verib.
Manenin “Nəcd cəngavərləri”nin heyətində çıxışının ümumi mənzərəsi 73 oyun, 26 qol və 18 məhsuldar ötürmədən ibarətdir.
Sadio Mane 2012-ci ilin may ayında debüt etdiyi Seneqal yığmasının heyətində 111 oyuna çıxıb, 45 qol vurub, 26 məhsuldar ötürmə verib. Sadio “Teranqa şirləri” ilə Afrika Millətlər Çempionatının (2022) qalibi olub.
“Transfermarkt” internet-portalı 32 yaşlı seneqallı cinah hücumçusunun transfer dəyərini 20 milyon avro məbləğində qiymətləndirir.
