Braziliyanın “Palmeyras” klubunun prezidenti, xanım Leyla Pereyra “Real”ın prezidenti Florentino Peres ilə dialoqunu xatırlayıb.
Arena.az “New York Times” dərgisinə istinadən məlumat verir ki, xanım Pereyra hazırda “qaymaqlılar”ın heyətində çıxış edən, “Palmeyras”ın braziliyalı keçmiş mərkəz hücumçusu Endriklə bağlı Pereslə söhbəti haqda danışıb:
“Florentino Peres mənə demişdi ki: “Leyla, mənə bildiriblər ki, Endrik Peledən daha yaxşıdır”. Mən isə onu belə cavabladım: “Sakitləşin, prezident, çünki Peleyə bənzər kimsə hələ də doğulmayıb”, deyə xanım Leyla Pereyra xatırlayıb.
Vurğulayaq ki, təqdimatına ehtiyac duyulmayan “Futbol Kralı” Pele zaman-zaman gəlib-gedən neçə-neçə futbolçunun örnək və müqayisə obyekti kimi təqdim edilsə də, dünya futbolunun braziliyalı əfsanəsinin bacarıqlarına və uğurlarına yaxın düşəcək futbolçu yoxdur. Belə ki, Pele nəinki meydanda, həm də meydandan kənarda alicənab davranışı, idmanı və sağlam həyat tərzini təşviq edən nümunəvi bir idmançı simasının təcəssümü idi. Pele oyunçu kimi üç dəfə dünya çempionu olub ki, bu zəfərə müvəffəq olmaq günümüzün gerçəyi bucağından əlçatmaz görünür.
Endrik “Palmeyras”ın yetirməsidir. “Real” Endriki 2024-cü ilin iyul ayında 47,5 milyon avro məbləğ müqabilində “Palmeyras”dan tamhüquqlu əsasda “qaymaqlılar”ın heyətinə qatıb.
Endrikin İspaniya nəhəngi ilə müqaviləsinin müddəti 2030-cu ilin iyun ayının sonuna qədər qüvvədədir.
Endrik “Real”ın heyətində 20 oyuna 4 qol və 1 məhsuldar ötürmə ilə fərqlənib.
Endrik 2022/2023-cü illər mövsümündə Braziliya A Seriyasının və 2023-cü il Braziliya Super Kubokunun qalibi olub, həmçinin 2021/2022-ci illər mövsümündə də “Palmeyras”la Braziliya çempionluğunu bayram edib.
Endrik “Real”la UEFA Super Kubokunun (2024/2025) və FIFA Qitələrarası Kubokun (2023/2024) qalibi olub.
Endrik 2023-cü ilin noyabrında debüt etdiyi Braziliya yığmasının heyətində 13 oyun keçirib və 3 qol vurub.
“Transfermarkt” internet-portalı 18 yaşlı braziliyalı hücumçunun transfer dəyərini 40 milyon avro məbləğində qiymətləndirir.
