Aİ-nin yeni anti-Rusiya sanksiyalar paketi bəzi ölkələrin çağırışlarına baxmayaraq, Rusiyadan mayeləşdirilmiş təbii qazın idxalına tam qadağa qoymayacaq. AFN.az xəbər verir ki, bu barədə “Politico” nəşri assosiasiyaya üzv ölkələrin adı açıqlanmayan nümayəndələrinə istinadən məlumat yayıb.Bildirilir ki, Avropa Komissiyası çərşənbə günü 16-cı anti-Rusiya sanksiyalar paketi layihəsini Aİ ölkələrinin hakimiyyət orqanlarına rəsmi olaraq təqdim edəcək. Yeni məhdudiyyətlər yalnız Aİ-nin ümumi qaz paylama sisteminə qoşulmayan LNG qəbul terminallarına təsir edəcək. Nəşr aydınlaşdırır ki, nəticədə sanksiyalar Rusiyanın LNG idxalının əksəriyyətinə təsir etməyəcək.Aİ həmçinin Brüsselin Rusiya neftini daşıyan “kölgə donanmasının” bir hissəsi hesab etdiyi 74 gəmini də sanksiya siyahısına daxil edəcək. Rusiya alüminiumunun idxalına məhdudiyyətlər tətbiq ediləcək - bu metalın Aİ-yə ümumi idxalında Rusiyanın payı təxminən 6% təşkil edir. Bu məhdudiyyətlərin nə qədər geniş olacağı açıqlanmır.
