İtaliyanın “İnter” klubunun mərkəz müdafiəçisi Tomas Palasios bundan sonra A Seriyasının digər təmsilçisi “Montsa”da çıxış edəcək.
Arena.az xəbər verir ki, bu barədə Milan təmsilçisinin mətbuat xidməti məlumat yayıb.
21 yaşlı müdafiəçi mövsümün sonunadək “Montsa”da çıxış edəcək. Müqavilədə satınalmaya dair şərt nəzərdə tutulmayıb. Bir sözlə, 21 yaşlı argentinalı müdafiəçi cari mövsüm başa çatan kimi yenə “İnter”in düşərgəsinə qayıdacaq.
Xatırladaq ki, Tomas Palasios Argentinanın “Talyeres” klubunun yetirməsidir. O, ölkəsində “İndependyente Rivadaviya” klubunun da formasını geyinib. Palasios “İnter”ə 2024-cü ilin avqust ayında 6,5 milyon avro müqabilində keçib. Gənc müdafiəçi Milan klubunun əsas komandasında cəmi 3 oyuna çıxıb. Tomas Argentinanın U-20 yığmasının da formasını geyinib.
“Transfermarkt” internet-portalı 21 yaşlı müdafiəçinin transfer dəyərini 6 milyon avro məbləğində qiymətləndirir.
“Montsa”nın mərkəz yarımmüdafiəçisi Xose Maçin isə “Kartaxena”ya keçib. Sözügedən klub 28 yaşlı futbolçunu cari mövsümün sonunadək icarəyə götürüb.
“Atletiko Malaqueno”, “Roma”, “Trapani”, “Luqano”, “Breşiya”, “Peskara”, “Parma”, “Frozinone” kimi klubların da şərəfini qorumuş Xose Maçin 2020-ci ildən “Montsa”nın formasını geyinir. O, bu klubun heyətində 83 oyuna çıxıb, 6 qol və 7 məhsuldar ötürmə müəllifi olub.
Xose Maçin Ekvatorial Qvineya yığmasının da şərəfini qoruyur. O, 2015-ci ilin noyabr ayında debüt etdiyi yığma komandanın heyətində 31 oyuna çıxıb, 4 məhsuldar ötürmə müəllifi olub.
“Transfermarkt” internet-portalı 28 yaşlı yarımmüdafiəçinin transfer dəyərini 500 min avro məbləğində qiymətləndirir.
