Ekspertlərin fikrincə, bu addım Azərbaycan və AŞPA arasında onsuz da gərgin olan münasibətlərin daha da pisləşməsi ilə nəticələnəcək.
Azərbaycan nümayəndə heyətinin AŞPA-da iştirakını bərpa etməsi ehtimalı varmı? Culhakyanın təyinatı hazırkı vəziyyətə necə təsir göstərəcək?
Globalinfo.az-a danışan deputat Fazil Mustafa deyib ki, Arusyak Culhakyan və ya başqa bir erməninin Avropa Şurası Parlament Assambleyasının vitse-prezidenti seçilməsinin heç bir əhəmiyyəti yoxdur:
"Çünki bir ermənidən asılı olmayaraq, onsuz da AŞPA-nın mahiyyəti bizim üçün bəllidir. Bu təşkilat açıq şəkildə Ermənistanın maraqlarını müdafiə edir. Azərbaycana qarşı mənfi münasibət də məhz buradan qaynaqlanır.
Fikrimcə, AŞPA-nın fəaliyyətində hər hansı ciddi dəyişiklik olmayacaq. Ümumiyyətlə, ermənilər bu kimi məsələlərdə hansısa bir mövqe tutmaqla Azərbaycana təsir edə bilməzlər. Arusyak Culhakyanın AŞPA-nın vitse-prezidenti seçilməsi təşkilatın ali dəyərlərindən uzaq olduğunu göstərir.
Azərbaycanın AŞPA-ya qayıtmaq üçün konkret şərtləri var. Hər hansı bir şəkildə bu şərtlər yerinə yetirilməzsə, Bakının mövqeyində dəyişiklik olmayacaq".
