Bəzi Aİ ölkələri alternativ tapılana qədər Rusiyadan mayeləşdirilmiş təbii qazın (LNG) idxalına qadağa qoyulmasına qarşı çıxır. Bu barədə Reuters agentliyi avropalı diplomatlara istinadən məlumat yayıb.
Agentlik diplomatlardan birinin sözlərini sitat gətirib: "Əvvəlcə siz sövdələşmə etməlisiniz, çünki əks halda siz həm Rusiyadan, həm də ABŞ-dan qazsız qalacaqsınız". "Ümumi ideya Avropa Komissiyası tərəfindən irəli sürülüb. Aydındır ki, bir və ya bir neçə üzv dövlət kifayət qədər etirazlarını bildirib ki, Komissiya indi belə bir tədbirin təklif edilməsini məqsədəuyğun hesab etmir", - avropalı diplomat bildirib.
Daha əvvəl Avropa nəşri “Politico” mənbələrə istinadən xəbər vermişdi ki, Avropa Komissiyası tədbirlər paketi layihəsini çərşənbə günü Aİ ölkələrinin hakimiyyət orqanlarına rəsmi şəkildə təqdim edəcək. Politico-nun məlumatına görə, yeni məhdudiyyətlər Rusiya Federasiyasından LNG idxalına tam qadağa daxil etməyəcək və yalnız Aİ-nin ümumi qazpaylayıcı sisteminə qoşulmayan yanacaq qəbul edən terminallara təsir edəcək. Nəşr aydınlaşdırır ki, nəticədə sanksiyalar Rusiyanın LNG idxalının əksəriyyətinə təsir etməyəcək.
