“Pley-offa vəsiqə şansımızı itirsək də, oyuna ciddi yanaşırıq və matça komanda yaxşı hazırlanıb”.
90deqiqe.Az xəbər verir ki, bu sözləri “Qarabağ”ın baş məşqçisi Qurban Qurbanov Yunanıstan mətbuatına açıqlamasında deyib.
53 yaşlı mütəxəssis Yunanıstan təmsilçisinin sürətli futbol oynadığını qeyd edib: “Ötən il Konfrans Liqasının qalibi olublar. Bunun özü komanda haqqında hər şeyi deyir. “Olimpiakos” çox sürətli futbol oynayan və yaxşı məşqçisi olan kollektivdir. Yəqin ki, turnirin ən sürətli komandalarından biridir”.
Qurbanov komandanın psixoloji cəhətdən hazır olduğunu da vurğulayıb: “Əksinə, bu matçdan yaxşı nəsə qazanmaq şansımız var. Psixoloji cəhətdən hazırıq və şübhəsiz ki, əvvəlki oyunlarımızla müqayisədə daha yaxşısını edə bilərik”.
Qeyd edək ki, “Olimpiakos” – “Qarabağ” görüşü yanvarın 31-də keçiriləcək. Matçın start fiti Bakı vaxtı ilə saat 00:00-da başlayacaq. Hazırda Azərbaycan çempionu 3 xalla 34-cü, “Olimpiakos” isə 12-xalla 12-ci pillədə yer alıb.
