Bu gündən etibarən çətin ve məsuliyyətli ikinci dövrə başlayır.
"Operativ Media" xəbər verir ki, bunu klubun mətbuat xidmətinə açıqlamasında "Qəbələ"nin baş məşqçisi Kaxaber Tsxadadze deyib.
O, komandasının zirvədəki yerini qorumaq üçün çalışacağını bildirib.
"Yay təlim məşq toplanışı ilə müqayisədə bu dəfəki toplanışda tətil də, hazırlıq da qısamüddətli oldu. Lakin futbolçularım yaxşı çalışırlar. Tətildə olduqları müddət üçün də tapşırıqlarım var idi ki, onları da yerinə yetirmişdilər. Üç yoxlama matçı oynadıq. İlk olaraq öz aramızda ikitərəfli oyun keçirdik. Daha sonra isə, "Mingəçevir" və "Qaradağ Lömbatan"la matçlarda gücümüzü sınadıq. Bu gündən etibarən isə çətin və məsuliyyətli ikinci dövrə başlayır. Çünki bütün komandalar gücləniblər. Komandamız bunu yaxşı başa düşür. Bu səbəbdən hər oyun bizim üçün finala bərabər olacaq. Hazırda 1-ci yerdəyik. Zirvədəki mövqeyimizi qorumaq üçün isə çox çalışmalıyıq"
Gürcüstanlı çalışdırıcı ikinci dövrənin ilk rəsmi oyunu haqqında da danışıb.
"Bugünkü oyun ilin ilk matçıdır. Bu səbəbdən çətin olacağı qaçılmazdır. Yoldaşlıq oyunları ilə rəsmi oyunlar arasında fərq çox olur. Psixoloji yüklənmə və sairə kimi çətinliklərin olması mümkündür. Buna baxmayaraq komandam "Baku Sportinq"lə oyuna tam şəkildə hazırdır".
