“Rusiya-Ukrayna münaqişəsi müvəqqəti sülhə yaxınlaşır. Bu, sonrakı həll olmayacaq, sadəcə hazırkı və ya bənzər təmas xəttində atəşin müvəqqəti dayandırılması olacaq”.
News24.az xəbər verir ki, bunu Azərbaycanın sabiq xarici işlər naziri Tofiq Zülfüqarov bildirib.
O qeyd edib ki, həm Zelenski, həm də Putin özlərini qalib elan edəcəklər.
“Lakin həm Ukraynada, həm də Rusiyada “qaliblər”in dəyişməsi məsələsi aktual olacaq, yeni oyunçular ortaya çıxacaq. Ukrayna siyasi elitasında və “Kreml qüllələri” arasında artıq “gizli” hərəkətlər başlayıb və hakimiyyət uğrunda ölümcül mübarizəyə hazırlaşılır”, - deyə o əlavə edib.
Sabiq nazir vurğulayıb ki, Qərb, onlarla əlaqə saxlayaraq, daha da gərginləşdirici siqnallar göndərir, müxalifət qarşıdurmasını daha da artırır:
“Təyyarəmizlə baş verən faciə Kremlin və Kremlə yaxın qrupların bundan daxili siyasi mübarizəsində istifadə üçün fona çevrilib. Rusiya mətbuatının idarə olunan “dövlətçi çığır-bağır salanları” və ölkəmizdəki “Rusiya imperiyasına qarşı döyüşçülərin” sinxron şəkildə “oxumasına” baxsaq, söhbət koordinasiya olunmuş çoxsəviyyəli əməliyyatdan gedir. Təbliğat kampaniyasının xarakteri onu göstərir ki, Rusiya xüsusi xidmət orqanlarından olan sifarişçilər Rusiyada, eləcə də Azərbaycanda öz agentlərinə nəzarəti davam etdirirlər. Ona görə də söhbət Rusiya dövlətinin hazırkı rəhbərinə açıq şəkildə meydan oxuyan iddialı və güclü “Kreml qülləsi”ndən gedir”.
T.Zülfüqarov bildirib ki, Azərbaycan Prezidenti mövqeyini açıq şəkildə bəyan etdi. “Bizim daxili siyasi münaqişələrinizə müdaxilə etməyin. Biz tələb edirik ki, Rusiya tərəfinin təyyarəmizlə bağlı mövqeyi yalnız beynəlxalq hüquq çərçivəsində qalsın, heç bir "görüşlərin" məsələyə daxil edilməməsi lazımdır”.
““Kreml qüllələri" və Qərb oyunçuları anlamalıdırlar ki, “yeni Priqojinlər” onların problemləridir və bizi bu macəraya çəkmək heç bir perspektivə sahib deyil”, - deyə o qeyd edib.
Aynurə
