“Qarabağ”ın baş məşqçisi Qurban Qurbanov Avropa Liqasının Liqa mərhələsində “Olimpiakos”a qarşı keçirdikləri səfər oyununu şərh edib.
Arena.az xəbər verir ki, Yunanıstan və Azərbaycan təmsilçiləri arasında Avroliqanın Liqa mərhələsinin sonuncu – səkkizinci turu çərçivəsində keçirilmiş bu oyunda “Olimpiakos” 3:0 hesablı qələbəyə sevinib.
Azərbaycan çempionunun baş məşqçisi Qurban Qurbanov matçdan sonra baş tutmuş mətbuat konfransında görüş barədə fikirlərini bildirib:
“Son oyunumuz idi və çox ciddi rəqiblə üz-üzə idik. Bu komandanın bu il Avropa Liqasının qalibi olmağa iddialı olduğuna şübhə etmirəm. Çünki ötən il Avropa Konfrans Liqasını qazanıblar. Bu il də arzuları, istəkləri, hədəfləri çox böyükdür. Bu komandada sürət, dinamika var.
Oyun sona qədər çox dinamik keçdi. Azarkeşlər də yaxşı atmosfer yaratmışdılar. Birinci hissədə hər şey qaydasında idi. Futbolçularımın yaxşı mübarizə aparmaları mənim üçün çox vacib idi. Bu gün bunu gördüm. Təəssüf ki, texniki səhvlər oldu və qapımızda 3 qol gördük. İstənilən halda futbolçularımın yanındayam. Növbəti avrokubok mövsümünə hazırlaşmaq üçün bu oyunlar böyük təcrübə oldu. Avropada futbol get-gedə dəyişir. Biz də növbəti mövsüm üçün böyük fayda əldə etdik”.
Qeyd edək ki, “Olimpiakos” 8 oyuna topladığı 15 xalla Avroliqanın Liqa mərhələsinin yarış cədvəlində 7-ci pilləni tutaraq 1/8 finala vəsiqə qazanıb. “Qarabağ” isə 3 xalla sonuncu – 36-cı yeri tutub və avrokubokların cari mövsümündəki çıxışını başa vurub.
