Xəbər verdiyimiz kimi, ötən gecə Sabunçu rayonu Maştağa qəsəbəsində “BakuBus” MMC-yə məxsus marşrut avtobusu qəza törədib.
“Qafqazinfo”nun məlumatına görə, hadisənin görüntüləri sosial şəbəkələrdə yayılıb.
Bildirilib ki, idarəetmədən çıxan avtobus Maştağa qəsəbəsi Nizami küçəsində yerləşən mağazaya çırpılıb. Avtobus mağazanı dağıdaraq arxa tərəfdəki həyətyanı sahəyə daxil olub.
“Bakubus” MMC-dən bildirilib ki, ilkin ehtimala görə, hadisə sürücünün sükan arxasında səhhətinin pisləşməsi səbəbindən baş verib:
“Ötən gecə saat 23:20 radələrində “Bakubus” MMC-nin istismarında olan 189 nömrəli marşrut xətti üzrə hərəkət edən 99-JU-926 dövlət qeydiyyat nişanlı avtobus Maştağa qəsəbəsi, Nizami küçəsində yol nəqliyyat hadisəsinə uğrayıb.
İlkin ehtimala görə, nəqliyyat vasitəsini idarə edən sürücü Babayev Haşım ürəktutma ilə əlaqədar idarəetməni itirib və nəticədə nəqliyyat vasitəsi yolun kənarında yerləşən marketə çırpılıb. Hadisə nəticəsində sürücü müxtəlif dərəcəli xəsarətlər alıb və dərhal tibbi yardım göstərilməsi üçün xəstəxanaya yerləşdirilib. Sərnişinlər arasında xəsarət alan olmayıb. Məsələ ilə bağlı aidiyyəti qurumlar tərəfindən araşdırma aparılır”.
Sözügedən qəzanın görüntülərini təqdim edirik:
